Mbas shumë “heshtjesh dhe harresash” nga politikanët dhe qeveritarët e Shqiperisë për Problemin mbarëkombëtar të Çamërisë Shqiptare;
Nga Sali Bollati– SHQIPTAR ÇAM New York 25 Tetor 2018
“Më 2013 për herë të parë në programin e një qeverie të votëbesuar në Kuvend është përfshirë Çështja Çame, si pjesë e programit të politikës së jashtme, që do të thotë se e gjithë loja që është luajtur në kurriz të kësaj çështjeje, sidomos me qeveritë e kaluara, është mbyllur një herë e mirë me përfshirjen e kësaj çështje si pjesë e programit të politikës së jashtme”, deklaroi zoti Ditmir Bushati në një intervistë me Zërin e Amerikës.
Si shqiptar i lindur ne Çamëri dhe i mbijetuar nga genocidi i ushtruar nga autorititetet shoviniste greke mbi Shqiptarët Çamë më 1944-1945; mbeta shumë i kënaqur dhe i entuziazmuar. Më së fundi, mbas pritjes vëllazërore të bashkëatdhetarëve dhe bashkëjetesës me ta gjatë 74 vjetëve, erdhi dita që edhe qeveria e Tiranës të zbatojë, simbas Kushtetutës në fuqi, të drejtat e shqiptarëve që jane lënë nga fuqitë europiane, jashtë kufive të minishtetit të sajuar më 1912.
Për më tepër, kam patur rastin që shkollën e mesme -Gjimnazin 28 Nëndori- ta kryej në Shkodrën “loce”- shumë të dashur, mikpritëse, plot humor e kulturë dhe Atdhetare. Mendova se zoti Ditmir Bushati, si pasardhës i Bushatllinjëve atdhetarë shkodranë që kishin mbajtur marrëdhanie alla shqiptarçe me Shqiptarët e Çamërisë, do të ketë në zemër e mendje edhe intelektualin e madh atdhetar, Hasan Tahsinin e Çamërisë. Hasan Tahsini para se të emërohej Rektor i parë i Universitetit të Stambollit, kishte shërbyer edhe si mësues i gjuhës shqipe i fëmijëve të Pashallarëve Bushatllinj.
Ne, maturantët e1955, jo vetëm kemi pasur, por mbajmë edhe sot marrëdhanie shumë të sinqerta dhe dashamirëse e respekt reciprok; por takohemi duke shkëmbyer të rejat e jetës shoqërore dhe familjare, si miq e vëllezër të vërtetë.
Ndërsa sot, çuditem shumë se si zoti Bushati deklaron: “kush bërtet i dëshpëruar për t’u faktorizuar në hartën e nacionalizmit ballkanik, s’ka lidhje me Çështjen Kombëtare??!”
Ore, zoti Bushati unë të njihja që para se të lindje si bir komunisti antishiptar, dhe mbasi ke kryer edhe studime një vjecare juridike ne Qendrën Europiane legislative të Universitetit te Athinës; nuk ka sesi të trashëgoje gjakun e Bushatllinjëve atdhetarë.
Mbrojtja e të drejtave të njeriut dhe dënimi i Genocidit ndaj popullsisë shqiptare të Çamërisë, nuk është “nacionalizëm”?!
Zoti Shpëtim Idrizi si kryetar i PDIU, ish nënkryetar i Parlamentit e si bir Çami, nuk është simbas teje nacionalist, por atdhetar mbrojtës i Legjislacionit ndërkombëtar për Mbrojtjen e të drejtave të Njeriut të “harruara” e të mohuara nga parardhësit e tu komunista. Ai me të drejtë të drejtohet: “..e ftojmë ministrin Bushati të vazhdoi të përshëndesi bashkëpunimin e turpshëm me ish-homologun Koqias, të investuar direkt me fonde sekrete greke në dëm të interesit kombëtar shqiptar.”
Keshtu zoti Bushati, po munde kujto gjakun atdhetar shqiptar dhe mos kërko të të mbajnë në prehër shovinistat, komplotistat dhe hajdutët e lypsarët grekë që me paturpësi dhe injorancë, jo vetëm e mohojnë Çështjen Çame, por urdhërojnë ta fshijmë nga librat??!
