Nga Erion Kristo
Disa fjalë për Teatrin.
1. Rama fitoi një betejë, por jo luftën. Strasburgu ende s’ka folur.
2. Gjithë energjia duhet të përqëndrohet te Presidenti. Deri më tani ka bërë pushime dhe ka parë ndeshje, tani duhet të tregojë që është mbi palët dhe ka burrni.
3. Kriminalizimi i gjithë mazhorancës është akti më barbar i Ramës. Gjysma e deputetëve të tij, janë njerëz krejt të panjohur dhe pa kontribute shoqërore. Demokracia jonë në këtë pikë i ngjan shumë ish-diktaturës.
4. Duke vlerësuar gjestin e z. Majko, ai nuk mjafton. Duhet që të tërhiqet nga qeverisja nëse kjo nuk është si ajo skema devijuese ku Bushati lagu me ujë opozitën, thjesht që të dënohej.
5. Kryqëzata kundër Teatrit Kombëtar na kujton kryqezatën kundër kishave dhe xhamive. Njerëzit ende kujtojnë se si u prishën ekskavatorët dhe se si u sëmurën ekskavatoristët.
6. Një gjë është e sigurt: bashkëqeverisja ka marrë fund. Mendimi i publikut s’ka më kuptim.
7. Çështja e Teatrit Kombëtar është çështje mbarëkombëtare. Djalëria e Kosovës, Maqedonisë, Malit të Zi, diaspora duhet të reagojnë.
8. T’i ndash artistët nga teatri është turp i padëgjuar. Teatri është godina më së pari. Aty bëhet teatër. Edhe në parlament bëhet teatër. Po këta artistë paguhen më shumë se ata të teatrit.
9. Godina nuk ka vënë bast më askënd. Kryeministri vë baste. Nuk duhen vënë baste.
10. Rama sillet si pronar me pronën publike se publiku e lejon. Kjo e kapërcen teatrin. Kjo është çështje publike.
11. Mirëkuptoj rrogëtarët, mirëkuptoj ata që heshtin, ata që keqpërdorën dhe ata që keqkuptohen e sulmohen. Nuk mirëkuptoj ata që vënë inteligjencën në shërbim të krimit.
12. Teatri ka histori, teatri ka vlerë, teatri duhet ruajtur si çdo trashëgimi tjetër. Këtë e treguan katërcipërisht mentarët tanë.
13. Ligji që kaloi është antikushtetues. Ai hedh poshtë disa ligje të rëndësishme. Ai krijon precedentin më të keq për ardhmërinë tonë.
14. Ligji që kaloi është korrupsion i mirëfilltë.
15. Të gjitha sajesat mbi teatrin ranë. Madje dhe përpjekjet për ta rrezuar nga brenda, apo gjoja zjarrfikësit e interesuar.
16. Teatri rri në këmbë pa ndihmën tonë. Ata që e bënë dinin shumë më tepër se kastravecët që kemi sot. Me pak ndërhyrje ai bëhet i mrekullueshëm.
17. Rroftë Teatri. Rrofshin ata që rezistuan.
