Reagon kreu i Partisë Demokratike: Rama gënjeshtar i çertifikuar nga Brukseli në Honolulu
Kryeministri Rama dhe kryetari i opozitës Lulzim Basha, vazhduan replikat për Byronë e Hetimit, në rrejtet sociale. Rama akuzon Bashën se e ndryshoi qëndrimin pasi kishte dhënë dakordësinë për draftin e Byrosë së Hetimit. Ndërsa Lulzim Basha ngul këmbë se kishte rënë dakord për draftin sipas rekomandimeve të komisionit të Venecias. Drafti i miratuar nga qeveria parashikon varësinë e Byrosë së Hetimit tek Ministria e Brendëshme ndërsa Basha thotë se kishte pranuar një version tjetër sipas të cilit Byroja të varet nga Prokurori i Përgjithshëm.
Pasi debatoi ashpër me kryeministrin në parlament, Edi Rama shkroi në rrjetet sociale: “Soli & Loli thone s’eshte ky drafti i dakordesuar per Byrone e Hetimit! Po mire atehere cili eshte drafti i dakordesuar? Tregojani publikut!”,
Në përgjigje të tij, Basha publikoi këtë mesazh në facebook: “Dielli me shoshë dhe e vërteta me rrena nuk mbulohen dot. Drafti që solli Rama sot në parlament ra me 21 dhjetor kur foli Venecia e tha se Byroja nuk mund të ketë drejtim tjetër veç prokurorisë. E ftova publikisht 3 herë ta miratonim me ndryshimin e Venecias dhe tha do pres prapë Venecian. Tani luan bllofin me draftin e skarcuar. S’i kam faj unë që njihet si gënjeshtar i çertifikuar nga Brukseli në Honolulu”, shkruan Basha.
Si në rastet e tjera, kur duhet të bashkëpunojnë për çështje madhjore si kjo e Byrosë së Hetimit, krerët e mazhorancës dhe opozitës vazhdojnë e gjejnë arsye për tiu larguar konsensusit. Zhvillimet e ditës së sotme në debatin për Byronë e hetimit e kanë larguar edhe më shumë mundësinë për miratimin e këtij institucioni të rëndësishëm për luftën kundër korrupsionit në nivelet e larta të politikës e qeverisjes.
