Ministri i Jashtëm Ditmir Bushati deklaroi se pikëpamja e PS për zgjidhjen e krizës politike është e ndryshme nga ajo e LSI. Sipas Bushatit zgjidhja e krizës nga ana e PS është e bazuar në Kushtetutën e Shqipërisë.
“Qytetarët shprehin vullnetin e tyre çdo 4 vjet. Nuk jemi peng i askujt, PS është partia më e madhe. Për zgjidhjen e krizës, LSI ka një pikëpamje jo të njëjtë me ne. Pikëpamja jonë është e bazuar në Kushtetutë”, tha Bushati.
Nga Shkodra ku ishte i pranishëm në një takim Bushati tha se ka një përpjekje për të destabilizuar vendin ndërsa shtoi se PS nuk po ushtron trysni ndaj askujt. Teksa foli për rëndësinë që ka Reforma në Drejtësi Bushati tha se ajo është një test për politikën ndërsa i kujtoi PD-së marrëveshjen e 21 korrikut
“Ka një përpjekje për destabilitet të vendit por ne jemi të vendosur për të shkuar përpara. Ne nuk ushtrojmë trysni ndaj askujt. E kemi axhendën zhvillimore të qartë. Duhet të përfundojmë reformën në drejtësi. Kjo reformë është një test për forcat politike. PD të zbatojë marrëveshjen e 21 korrikut”, deklaroi Bushati.
