Kreu i Partisë Demokratike, Lulzim Basha në një takim në Burrel, tha se shqiptarët janë vendosur për të marrë fatin e tyre, në dorë.
Gjatë fjalës së tij, Basha i është përgjigjur edhe ftesës së Ramës pë dialog, ku tha se opozita është e vendosur të mos bëjë asnjë hap pas, ndërsa shtoi se beteja e tyre do të jetë për jetë a vdekje.
“Koha kur një grusht horrash mbanin peng një Shqipëri të tërë mori fund. Një shoqëri e lirë, e përbërë nga njerëz të drejtë mund të humbë përkohësisht rrugën, por vjen një moment që një shoqëri ka nevojë të mund të frikën, të gjejë kurajon që na bën njerëz, bij prindërish, prindër fëmijësh, na bën njerëz që duam dinjitet e nuk pranojmë më të shkelemi me këmbë dhe kjo orë ka ardhur. Ka ardhur ora dhe ne nuk do bëjmë asnjë hap pas, vetëm përpara, drejt rrugës që na çon tek vlerat europine, perëndimore. Nesër dhe në ditët e ardhme vendoset fati për 10 vitet e ardhme dhe fundi i tranzicionit dhe ëndrra jonë për Shqipërinë si gjithë Europa do jetë konkluzioni final i kësaj beteje. I shtrijmë dorën aleatëve tanë, mirënjohje Gjermanisë mike dhe SHBA që publikisht dhe jo publikisht nuk e lini vetëm popullin shqiptar në këtë betejë për jetë a vdekje. Për ne s’ka rrugë tjetër përveç asaj europiane, largimi i Edi Ramës nuk negociohet. Nuk do të vijë 30 qershori, shqiptarët janë ngritur, shqiptarët janë bashkuar, ne nuk do ta lejojmë”,- tha prerë Lulzim Basha.
Basha u kthye pas në kohë në protestën e 16 shkurtit dhe në takimin e mbajtur në Burrel, pak para djegies së mandateve.
“Nuk e harroj se me 14 shkurt vetëm dy ditë para protestës madhështore të 16 shkurtit, që diktoi me vullnetin e patjetërsueshëm djegien e mandateve dhe rrjeshtimin e patjetërsushëm të mandateteve, takimin e fundit e zhvillova këtu në Mat, Burrel. Nisi si një takim përfundoi si një miting. Ishte një ditë e ftohtë, por nuk e ndjeva të ftohtin ndjeva nxehtësinë e pranverës që po vjen. Ja ku jemi sot. Shqiptarët janë më të bashkuar, më të vendosur se kurrë për të marrë në dorë fatin e tyre. Për t’ia shkulur nga thonjtë oligarkisë bandës së krimit të Edi Ramës Shqipërisë tonë të dashur.”-tha Basha.
