Edhe pse efektet do të jenë të vogla, Brexit do ndjehet edhe në ekonominë shqiptare.
Guvernatori i Bankës së Shqipërisë Gent Sejko në konferencë me FMN-në, theksoi se aktualisht po analizohen zhvillimet në sistemin bankar dhe sidomos në efektet që do të ndjehen nga remitancat.
Sejko: Ne po monitorojmë dhe ekspozimet që këto banka, pra mëmat e tyre kanë në tregjet ndërkombëtare. Në ekspozimin direkt nuk kanë, por indirekt në efektet që mund të kenë mëmat, është një element tjetër që mund të reflektohet në periudhat e më pasme. Praktikisht, më gjerë lidhur me fenomenin e Brexit, njësoj si bankat ashtu edhe në ekonominë shqiptare ne nuk kemi një efekt të qenësishëm, direkt, pasi në të gjitha aspektet në import-eksportet që kemi me Britaninë e Madhe është e papërfillshme.
Ndërkohë shefja e FMN-së për Shqipërinë, Anita Tuladhar, deklaroi se është ende herët për të analizuar efektet e Brexit në ekonominë shqiptare por edhe në Eurozonë.
Tuladhar: Ne nuk shohim kanale direkte të transmetimit të krizës së Britanisë në termat e tregtisë apo dërgesave dhe investimeve të huaja. Megjithatë, ekziston rreziku që vjen nga ajo se çfarë do të ndodhë në Eurozonë. Është ende herët dhe ka ende shumë pasiguri, por ne besojmë se ky kanal indirekt do të jetë burimi kryesor i rrezikut për Shqipërinë.
Sipas vlerësimeve të para nga Standart and Poors vetëm ditën e premte pasi rezultatet e referendumit britanik u bënë publike bursat në të gjithë botën humbën rreth 2 trilionë dollarë shifër e njëjtë sa 2.7 % e prodhimit të përgjithshëm botëror.
Ekspertët gjykojnë se përveç tronditjeve të para pasojat e BREXIT në ekonominë globale do të varen shumë nga negociatat mes BE dhe Britanisë.
