Kryeministri i Britanisë Boris Johson ka prezantuar sot masat e reja kundër përhapjes së pandemisë, disa ditë pasi vendi i tij po përballet me një rritje gati katër herë më shumë të rasteve me koronavirus.
Plani i ri që pritet të hyjë në fuqi nga e mërkura, parashikon ndarjen me tre nivele të zonave; mesatar, i lartë dhe shumë i lartë. Secila parashikon masa të ndryshme, ndërsa në fuqi mbetet rregulli i 6-ës, që do të thotë se vetëm 6 persona nga dy familje të ndryshme mund të lejohen bashkë. Po ashtu në fuqi mbetet edhe vendimi për mbylljen e bizneseve në orën 22:00.
Pjesë nga deklarata e Johnson:
Numri i rasteve është katërfishuar në javët e fundit, ka më shumë njerëz në spitale sot se në fund të marsit. Ka nga ata që thonë se duhet të shkojmë në një karantinë të plotë, duke shkatërruar jetët tona. Nuk mendoj se kjo është rruga e duhur, nuk do të ndalojmë edukimin e fëmijëve dhe nuk do të shkatërrojmë ekonomine. Nga ana tjetër ka nga ata që thonë se duhet ta lëmë natyrën të bëjë punën e vetë, se njerëzit dhe pacientët janë lodhur. Por nëse do ta ndiqnim këtë rrugë, do të përjetonim një valë të madhe vdekjesh, por edhe do të vendosnim mbi NHS-në një presion të madh.
Kemi zgjedhur një rrugë të balancuar. Të mbajmë shifrat poshtë teksa shkolla dhe ekonomia vazhdojnë. Ndaj kemi kufizime si mbyllja me orar e bizneseve. Disa prej të cilave kanë bërë punë të mirë që të rihapen sipas udhëzimeve. Duhet të shpëtojmë jetë. I pa kontrolluar, një person i infektuar mund të infektojë 2.3 në 3 njerëz të tjerë. E kemi ulur më tepër këtë shifër, por duhet të bëjmë edhe më shumë.
Masat e reja për tre nivelet e sigurisë do të diskutohen sot dhe nesër, më pas do të votohen për të hyrë në fuqi nga e mërkura. Javët dhe muajt e ardhshëm do të jenë të vështirë, por ne do t’ia dalim.
