Nga protesta e opozitës para Kryeministrisë, kreu i PD, Lulzim Basha ka deklaruar se Rama ka vendosur sërish në kandidim persona të lidhur me krimin në zgjedhjet e 30 qershorit.
“Një tubim madhështor që do të shërbejë për fitimin e betejës sonë kombëtare për Shqipërinë si gjithë Europa”, e përshkroi ai protestën e kësaj të shtune.
“Vetëm nga bashkimi juaj, qëndresës suaj, sot jemi bashkë më të vendosur se kurrë. Për herë të parë që nga nisja e kësaj proteste, zëri juaj u dëgjua, nuk do të ketë asnjë fund tjetër përveç largimit të qeverisë së krimit. Mjerë ai që nuk ka vesh e nuk dëgjon. E dëgjoi e gjithë bota se zgjedhje demokratike pa opozitën nuk ka dhe nuk do të ketë. Rama ka vendosur sërish në kandidim persona të lidhur me krimin në zgjedhjet e 30 qershorit. Pjerin Ndreu, Dionis Imeraj, Valbona Sako, janë të përfshirë, pjesëmarrës në skemën e shitblerjes së votave. Siç është Agron Malaj në Burrel, siç është Arbana në Shijak, pjesëtarë i bandës së Avdylajve. Për pushtetin e tij, pasurinë e tij, do që më 30 qershor t’i gradojë bashkë me bashkëpunëtorët e tyre dhe përfundimisht të vendosë zgjedhën e krimit në Shqipëri”, tha Basha.
