Këtë qëndrim e deklaroi dje ish-kryeministri Sali Berisha, pas seancës parlamentare
Kryetari i PD-së Lulzim Basha, deklaroi sot të njëjtin qëndrim me Berishën lidhur me Reformën në Drejtësi. Në komunikim me mediat, Basha kushtëzon konsensusin për reformën me mandatine dy deputetëve të mazhorancës Valentina Leskaj dhe Rakip Suli. PD kërkon që mandati i tyre të shkojë në kushtetuese. “A mund të ketë dialog kur njëra palë në tavolinë nxjerr armën? Sigurisht që jo. Edi Rama në fakt nuk vë armën në tavolinë, por bombën atomike kushtetuese. Po diskutojmë që të bëjmë disa ndryshime në Kushtetutë për drejtësi më të pavarur, për rregulla kushtetuese dhe ligjore, ndërkohë që Rama thotë që nuk dua të zbatoj rregullin aktual, që thotë se nëse një deputet kapet me fondet publike shkon në Gjykatën Kushtetuese. Nuk negociohet as Kushtetuta dhe as vendimi i Gjykatës Kushtetuese. Pa zbatuar vendimin, dialogu me Edi Ramën është baraz me dialog me terroristët dhe Partia Demokratike nuk dialogon me terroristët”, u shpreh Basha.
Basha kërkon më parë miratimin e Byrosë Kombëatre të Hetimit dhe më pas Reformën në Drejtësi. Qëndrimi i ndryshuar i kryetarit të PD-së duket të jetë në të njëjtën linjë me atë të ish-kryetarit Berisha. Ambasadori amerikan tha dy ditë më parë se Byroja e Hetimit të miratohet bashkë me reformën në drejtësi duke i tërhequr vëmëndjen partive të mos e përdorin Byronë për përfitime politike. Pavarësisht kësaj, Basha tha sot se PD kërkon më parë Byronë Hetimit më pas Reformën në Drejtësi.
“Byroja Kombëtare e Hetimit në veçanti dhe reforma në drejtësi do të kryhen sipas rekomandimeve të Venecias, sipas standardit europian. Askush nuk do të ndalë, deformojë apo devijojë këtë vullnet që në fakt buron nga qytetarët shqiptarë për të pasur një drejtësi të pavarur nga politika dhe në gjendje që të vendosë politikën para drejtësisë”, deklaroi Basha.
Kreu i PD-së, theksoi se kishte siguruar mbështetjen amerikane dhe garancinë e tyre që ligji i dekriminalizimit do të zbatohet, por edhe angazhimin për zgjedhje të lira dhe të ndershme. Ai ka përmendur edhe Al Kaponen që u mor si shembull dy ditë më parë nga ambasadori amerikan në Tiranë, duke thënë se ai është ulur në Kryeministri dhe është Edi Rama. Basha tha gjithashtu se SHBA nuk sheh vetëm opozitën por alternativën e qeverisjes së të nesërmes.“Nga Washingtoni nuk kthehem si i panjohur por vizita e parë si kryetari i opozitës më obligon për të shprehur mirënjohjen e madhe ndaj mikëpritësve. Duhet të them që SHBA nuk sheh PD vetëm opozitë por alternativën e qeverisjes së të nesërmes. Vij me garancinë se procesi formalisht i porsanisur i reformës në drejtësi do të jetë të njëjtën vëmendje dhe kalendar koherent mbëshetjeje nga SHBA” tha Basha duke shprehur dhe optimizmin se ligji për dekriminalizkmin nuk do të mbetet në sirtar por personat me rekorde kriminale do të largohen nga zyrat e shtetit dhe të politikës” tha Basha.
