Nga çadra e protestës, kryetari i Partisë Demokratike, Lulzim Basha falenderoi pjesmarrësit në protestën e së shtunës dhe përsëriti se “nuk do të ketë më zgjedhje moniste” në Shqipëri.
“Shqiptarët folën, nuk ka e nuk do të ketë zgjedhje fasadë. Nuk ka e nuk do të ketë Parlament të diktuar nga krimi e droga. Nuk ka e nuk do të ketë më zgjedhje pa popullin dhe pa opozitën. Nuk do të ketë më zgjedhje moniste. Republika e re që do të zëvendësojë së shpejti ligjërisht të vjetrën që po bie, kërkon tranzicionin e butë, përmes zgjedhjeve të lira e të ndershme, që mund të sigurohen vetëm përmes një qeverie teknike që ndahet nga krimi e lufton drogën.
Republika e re e ka nisur rrugën e saj, nuk do të ketë asnjë hap prapa. Nëse nuk tërhiqen nga plani për zgjedhjet fasadë, do ta përmbysim republikën e vjetër përmes marshimit, bashkimit e qëndresës popullore të qytetarëve të republikës së re”, tha Basha.
