Kryetari i Partisë Demokratike Lulzim Basha akuzoi Kryeministri Rama se ai solli kriminelët në institucione për të mbajtur pushtetin politik dhe me ato i shkatërroi institucionet, ekonominë shqiptare.
Gjatë fjalës që mbajti në çadër ku prej 49 ditësh po zhvillon protestën opozita Basha lëshoi edhe një mesazh për ndërkombëtarët ku i tha se të mbyllësh sytë para krimit dhe drogës, do të thotë që je ose i papërgjegjshëm ose i korruptuar nga paratë e narkomafies.
“Ka miq dhe dashamirës të Shqipërisë që për një aryse apo një tjetër nuk kanë informacionin e plotë. Me ta duhet të kemi durim, duhet të kemi të hapur rrugën e dialogut për të informuar mbi këto të zeza. Ka edhe të tjerë që nuk duan të informohen. Atyre, pavarësisht se nga vijnë dhe çfarë posti mbajnë, u them: që të mbyllësh sytë para krimit dhe drogës, do të thotë që je ose i papërgjegjshëm ose i korruptuar nga paratë e narkomafies” – tha Basha.
Më tej Basha ripërsëriti kërkesat për zgjedhje të lira dhe largim e Ramës nga posti i Kryeministrit.
“Nuk lihet kauza e zgjedhjeve të lira tek ata që sollën drogën. Rruga e vetme është largimi i një orë e më parë i Edi Ramës nga karrigia e kryeministrit” -u shpreh kryedemokrati.
