Kreu i opozitës, Lulzim Basha ka deklaruar dje me bindje nga Berati se dosja me përgjime për Ballën dhe Gjiknurin është në dorën e ndërkombëtarëve.
“Po po! Taulant Balla, Damian Gjiknuri, tabulatet tuaja janë depozituar tashmë tek partnerët ndërkombëtarë, teksa u bëni presion 4 anëtarëve të KQZ-së që të marrin një vendim të paligjshëm për të eliminuar anëtarët e opozitës nga KZAZ-të, për të kryer një tjetër krim kushtetues. Mendoni se nuk ju sheh njeri?
E keni gabim! Mendoni se shkatërruat Gjykatën Kushtetuese dhe Gjykatën e Lartë, kapët Prokurorinë? E keni gabim! Sytë e opozitës, sytë e shqiptarëve, sytë e partnerëve tanë euroatlantikë po ju vëzhgojnë çdo minutë! Ju, o sejmenë të Edi Ramës, nuk keni asnjë shans!” tha dje kreu demokrat.
Deklarata e Bashës vjen pas publikimit nga gazeta gjermane “Bild” të një pasazhi nga dosja e cila përmban përgjimet për vjedhjet e votave, ku përveç kryeministrit Rama janë të përfshirë edhe 2 figura të tjera të larta të Rilindjes.
Kujtojmë se Taulant Balla dhe Damian Gjiknuri, dy nga njerëzit më të afërt të Edi Ramës janë shfaqur në shumë përgjime, por më i rëndi është ai kur ju bëjnë presion 4 anëtarëve të KQZ, për të marrë një vendim të jashtëligjshëm zgjedhor dhe kushtetues.
