Nga Erion Kristo
Disa shënime për situatën:
Me Saimir Tahirin jam njohur rreth fundit të qeverisjes së dytë të Berishës. Ishte i vetmi deputet i PS që ju përgjigj thirrjes sime për aksidentet rrugore. Ai ndikoi dhe unë me plot miq të tjerë shkuam në parlament dhe diskutuam për ndryshimet ligjore. Ishte koha që PS e PD kishin një marrëveshje. PD u tregua e hapur ndaj reagimit tonë.
Pasi u bë minister shkova dhe e takova, sërish për këtë çështje, dhe më ka respektuar. Pra, nuk kam pasur ndonjë situatë të fshehtë me të, por kemi komunikuar dhe ai është përgjigjur në mënyrë perfekte.
Pas 1.5 vitesh në detyrë kuptova se ai mori një drejtim tjetër, që mua s’më pëlqente. Unë e kam kritikuar disa herë për sjelljet e policisë, madje një herë më sulmuan shumë nga aguridhet e ministrisë. Aty u distancova prej tij. Më pas kemi komunikuar 3 apo 4 herë me mesazhe për të ftuar disa personazhe në emision. Ai është treguar i gatshëm.
Mua nuk më pëlqente arroganca e policisë, që ai e frymëzonte. As shoë me kamera. Sa kam thënë publikisht që policia ka ndryshuar vetëm veshmbathjet, po jo sjelljet. Nëse dikur mungonte, tani e tepronte me praninë e saj. Policia arrestonte pa shkak. Këto janë fakte.
Kur plasi droga, unë e mora vesh shpejt dhe e kemi deklaruar. Policia e shtetit u kthye në Bujqësia e shtetit. Lazaratizimi i çdo centimetri katror të vendit, deri afër aeroportit, është fakt i pamohueshëm. Arrestime ka pasur, po aspak koka. Policia filloi të punonte dobët në fushat e tjera. Kuptohet se energjia e saj shkoi te droga.
Këto qëndrime i kam bërë publike.
Lidhur me arrestimin e tij, mendoj se është një spektakel i panevojshëm. Ka pasur dhe arrestime të ngjashme që kanë dalë fiasko, kujtojmë guvernatorin. Mos u gëzoni kot. Edhe pse historitë e makinës janë fare qesharake, deri tani nuk ka ndonjë provë solide.
Ne, si publik, nuk duhet të ekzaltohemi, duhet të rrimë indiferentë. Prokuroria e fjetur u zgjua papritur, ajo prokurori që e shpalli të pafajshëm. Ne duhet t’i leme këta të hanë kokat me njëri-tjetrin. Çeshtje si, e shiti-se shiti, qau-s’qau, fëmija-familja janë pa vlerë. Edhe fronti kundër krimit është pa vlerë.
Mua nuk më pelqen kur dikujt i vihet shkelmi në fyt. Këtë qëndrim e kam pas gjithmonë. Ju ftoj të jemi kërkues ndaj institucioneve, njëzëri. Dhe të reagojmë me qytetari. Nuk mund të pranoj që klane të errëta të përfitojnë nga kjo situatë.
