Më në fund ambasadorja e Shteteve të Bashkuara të Amerikës, Yuri Kim e kuptuar lojën e Rilindjes me kriminelët e infiltruar në zgjedhjet e 25 prillit.
Ajo ka thënë mbrëmjen e djeshme se shqiptarëve u ka ardhur “në majë të hundës” me korrupsionin, pandëshkueshmërinë dhe me kriminelët që ulen në parlament. Në një intervistë të dhënë për gazetarin Lutfi Dervishi, Yuri Kim ka kërkuar nga votuesit shqiptarë që ta tregojnë se nuk duan më këtë realitet, ndaj data 25 prill është momenti që ata të votojnë për ndryshimin.
“Votuesit shqiptarë janë shpresa e parë më e mirë. Kjo është baza e çdo demokracie, votuesit. Ndaj mendoj që njerëzit i kanë bombarduar të besojnë se nuk kanë pushtet. Fakti që dikush përpiqet të blejë votën tënde duhet të tregojë se nuk jeni pa pushtet. Ky është pushteti juaj. Vota jote është pushteti yt. Shqiptarët që takoj kudo në vend më thonë se iu ka ardhur në majë të hundës nga korrupsioni; iu ka ardhur në majë të hundës nga pandëshkueshmëria; iu ka ardhur në majë të hundës nga kriminelët që ulen në parlament. Epo, ky është momenti. Ma tregoni me veprime, tregojeni me veprimet tuaja se e keni seriozisht. Nuk mund të ndodhë që më kërkoni opinionin tim si Shtetet e Bashkuara, unë jua jap dhe pastaj ju vazhdoni të bëni të njëjtën gjë. Nëse doni ndryshim, votoni për ndryshim. Nëse doni kriminelë, votoni për kriminelë. Por, ajo që bëni duhet të përputhet me atë që thoni se doni. Dhe 25 prilli është momenti”,- u shpreh Kim.
Gjithashtu, Kim tha që përpjekja për të blerë vota është krim ndaj ata politikanë që tentojnë të blejnë vota ajo i cilëson kriminelë.
“Duhet të vrasin mendjen, kur kriminelët dhe të tjerët vijnë tek ata për t’iu blerë votat… Pse i quaj kriminelë? Sepse përpjekja për të blerë vota është një krim, ndaj jeni një kriminelë. Nëse përpiqeni të bleni një votë, jeni një kriminel. Por, votuesit duhet të vendosin. Do ta shes pushtetin që kam? Do ta shes dinjitetin? Do ta shes të ardhmen e fëmijëve? Mendoj se përgjigja duhet të jetë: Jo!”,- theksoi Kim.
