“Basha nuk më bën dot mua fajtor për humbjen e Partisë Demokratike në zgjedhjet e 25 qershorit sepse 230 mijë njerëz të PD refuzuan të votojnë Lulzim Bashën”.
Ishte kjo deklarata e Igli Carës në emisionin “Fol me mua, fol me ata”, të Enkel Demit në TVSH.
Ish-deputeti i PD dhe ish-kreu i kësaj partie për Durrësin theksoi procesi për zgjedhjen e kryetarit është farsë, ndaj nuk do të votojë me 22 korrik.
“Berisha për të shpetuar PD tha faji i humbjes është i imi, kurse Basha u fsheh pas tyre që sipas tij nuk morën pjesë në fushatë. Mua më caktoi asnjë rol vetëm të ndiqja fushatën në zonën time, ai ishte trajneri ne bëmë atë që na tha. I kërkuam zgjedhje të lira Ramës minimumi duhet t’i bëjmë në partinë tonë. Proces farsë, Selami tha sot se nuk ka listat e anëtarëve të PD. Nuk i japin listat, kjo është t’i vjedhësh zgjedhjet pa filluar. Nuk mund të pranoj të vidhet në shtëpinë time, refuzoj ta pranoj Bashën si kryetar pas këtyre zgjedhjeve”, tha Cara.
Ai paralelizoi sjelljen e Bashës me atë të diktatorit Hoxha ku tha se edhe Enveri në hartimin e listave konsultohej, gjë që Basha nuk e bëri.
“Edhe Enver Hoxha me Nexhmijen nuk i bënte dot listat pa bërë një konsultë, Basha i bëri pa mbledhur kryesinë”, u shpreh ai.
Megjithë kritikat, që Cara thekson se nuk është kundër Bashës por kundër procesit, ai shprehet se ka shpresa që të reflektohet dhe nëse kjo nuk ndodh, thotë se shkelja statuture do të denoncohet në gjykatë.
“Akoma kam shpresa se antarësia dhe forumet të bëjnë gjithçka që ta kthejnë PD në rrugë të drejtë. Nëse Basha nuk reflekton, do ta çojmë çështjen në gjykatë pasi nuk është respektuar statuti i PD”, u shpreh ai.
