Ish-kryeministri Berisha paralajmëron largimin nga Kuvendi: Nuk është më një hipozetë
Lideri historik i Partisë Demokratike, mund të lërë mandatin e deputetit. Në një njoftim për shtyp, pas takimit me ambasadorin amerikan Donald Lu, sqarohet se lënia e mandatit të deputetit nuk është më një hipotezë. Berisha e sheh të pamundur qëndrimin në një parlament ku Edi Rama kthen aty, Armando Prengën, deputetin e arrestuar për plagosje me armë. “Në takim u diskutua mbi zhvillimet në Parlament. Zoti Berisha u shpreh që, nëse disa muaj më parë kishte shprehur mundësinë e dorëzimit të mandatit, kjo ishte një mundësi hipotetike, por në kushtet e krijuara, me sjelljen nga Rama të Prengës në Parlament, ai e gjen shumë të vështirë pranimin e një Parlamenti të tillë, të përgjakur”. Në këtë kontekst, zoti Berisha theksoi se qëndrimi i Ramës pas vizitës së Sekretarit Kerry, në të cilën ai lavdëroi forcat politike në Shqipëri për ligjin e dekriminalizimit, është i papranueshëm.
“Shfaqja, të nesërmen, e Ramës me Rroshin, dërgimi i ministrit tek Bushi dhe kthimi i Prengës në Parlament, janë të gjitha mesazhe të besnikërisë së Ramës ndaj kriminelëve dhe krimit, dhe kjo e bën vendin shumë të pasigurtë” mësohet të ketë thënë Berisha.
Po kështu, Berisha theksoi se kjo qeveri ka zhdukur ligjin e konfliktit të interesit dhe sot pasuritë publike po rrëmbehen me shpejtësi të madhe nga vëllezërit, fëmijët, baballarët e Ramës, ministrave të tij dhe qeveritarëve të tjerë. Ai u shpreh se kjo përbën një problem madhor për vendin ndaj dhe theksoi se është emergjente çdo plotësim ligjor i nevojshëm për të mbrojtur pasuritë publike të vendit.
Ambasadori amerikan Donald Lu i shoqëruar dhe nga shefi i OPDAT, Jon Simbert, i dorëzuan sot ish-kryeministrit Sali Berisha dokumentin e opinionit të Komisionit të Venecias të datës 26 shkurt 2016.
Në takim u diskutua gjerësisht për reformën në drejtësi. Berisha theksoi se në bindjen e tij, dokumenti i Komisionit të Venecias përbën një bazë parimore, solide, të shëndoshë për të ecur përpara dhe kompletuar reformën në drejtësi.
