Nga Ralf Gjoni
Turp për Tiranën! Turp për Bashkinë! Turp për policinë bashkiake! Turp për opozitën që po e politizon e që e menderosi për 4 vjet! BRAVO SHOQERIA CIVILE!
Pashë një video ku ilustrohej se çfarë masakre do i bëhej kësaj pjese të asaj hapësire të vetme të gjelbërt që na ka mbetur në Tiranë. Ai beton me ca hekurishte që brenda vitit do kthehen në grafiato e ndryshk, e që çuditërisht po etiketohet si “kënd lojrash”, plus tingujt e këngës fëminore në sfond, nuk janë tjetër veçse një hedhje hi syve, për të jusifikuar hedhjen në plehra të parave e për të çimentuar parkun e liqenit, duke grabitur edhe një copëz nga ajo pak që ka mbetur.
Që Bashkia mendon për fëmijët, kjo s’ka asgjë të keqe. Por të mendojë tjetërkund, mes lagjeve, atje ku jeton komuniteti jo mes parkut. Këtu është e qartë që ka mungesë transparence dhe ka një ndjeshmeri publike. Për këtë arsye, i kërkoj publikisht Kryetarit të Bashkisë Erion Veliaj (si ish kolegë të shoqërisë civile) të ndalë çdo plan për të ndërtuar në park, të kërkojë ndjesë e të marrë masa për sjelljen arrogante të policëve bashkiakë, dhe plani të hidhet për diskutim e shqyrtim në Këshill Bashkiak. Më pas të organizohet një tryezë e rrumbullakët me grupet e interesit, me shoqërinë civile e me ambjentalistët. Vetëm nëse të gjitha palët janë dakord, atëherë fiton legjitimitet projekti.
Nevojitet një konsensus qytetar civiliteti që çdo projekt që prek Parkun e Tiranës të kalojë përmes këtij procesi. Shpeshherë konsensuset e pashkruara qytetare kanë më shumë peshë se sa ligjet e shkruara. Shqipëria ka nevojë për mendësi tjetër qeverisjeje jo për arrogancë! Transparenca dhe e drejta morale, qytetaria dhe përgjegjësia mjedisore nuk mund të baltosen me fshehjen e arrogancës, kokëfortësisë dhe interesave klienteliste pas ca neneve ligjore që mund të interpretohen multi-dimensionalisht.
Tirana nuk është e Bashkisë! Tirana u përket qytetareve, dhe familjeve me fëmijë në rradhë të parë, përfshirë familjeve opozitare! Kush ka fëmije e kush e do atë park, e kupton qartazi këtë mesazh…
