Kryeministri Rama e ka cilësuar qesharake protestën e opozitës për zgjedhje të lira dhe të ndershme pasi sipas tij nuk ka ndonjë provë që zgjedhjet nuk do jenë të lira dhe të ndershme.
Në ‘Komunikimin javor’ Rama tha gjithashtu se zgjedhjet e 18 qershorit do të jenë të lira dhe të ndershme, më të mirat që Shqipëria ka zhvilluar ndonjëherë dhe se koalicioni qeverisës do kërkojë një tjetër mandat për të vijuar reformat për të bërë shtet.
Gjithashtu Rama është shprehur që udhëheqësit e kësaj proteste kanë një bilanc politik të dobët në raport me standardet e zgjedhjeve. Më tej Rama ngre disa pikëpyetje se pse po proteston opozita.
“Këtu kam një problem, jo me demokratët, por me udhëheqësit, sepse më tingëllon qesharake që këta udhëheqës protestojnë kundër qeverisë për zgjedhje të lira dhe të ndershme. Kush është kundër tyre? Ka pasur për më tepër ndonjë shprehje shqetësimi nga OSBE ODIHR, apo institucion ndërkombëtar, për ndonjë cenim të zgjedheve?
Absolutisht jo. A ka ndokush ndonjë fakt konkret që mund të shërbejë si provë që zgjedhjet e ardhshme do ndalohen të jetë të lira dhe të ndershme? Absolutisht që jo. Opozita ka braktisur që në krye të herës komisionin e reformës zgjedhore. Për më tepër, udhëheqësit e protestës së djeshme kanë një bilanc personal dhe politik shumë të dobët, për tu harruar, në raport me lirinë dhe të drejtën e protestës si dhe standardet e zgjedhjeve” tha Rama.
“Udhëheqësit e kësaj proteste kanë qenë për një kohë të gjatë në pushtet dhe në qeverisjen e tyre Shqipëria kanë bërë shumë pak progress. Udhëheqësit e opozitës e dinë se reformat tona prekin fije interesash të errëta dhe po përpiqen ta përdorin këtë shesh si shesh për të bërë përshesh. Reforma në drejtësi dhe vetting-u janë sholrehja për të bërë shtet dhe fantazma për gjumin e atyre që për 25 vjet e kthyen drejtësinë në mjet për të përfituar në kurriz të këtij populli socialistë e demokratë. Vetting-u do të pastrojë këtë politikë. Të bërtasësh sot për varfërinë, korrupsionin, dhe të jesh kundër reformës e vetting-ut është kulmi i hipokrizisë. Çadra në Bulevard strehë për t’u mbrojtur nga Vetting-u”, tha ndër të tjera Rama.
https://www.facebook.com/edirama.al/videos/10154489692906523/
