Përfaqësuesja më e Lartë e BE-së për Politikë të Jashtme, Federica Mogherini tha se angazhimi konstruktiv që është parë gjatë dy takimeve të fundit në Bruksel në kuadër të dialogut mes Kosovës dhe Serbisë, sot ka sjellë rezultate.
Duke komentuar rrëzimin e murit, Mogherini ka thënë se sot është zbatuar marrëveshja e cila është arritur në Bruksel.
“Kjo do të kontribuojë për lirinë e lëvizjes, kontaktet mes njerëzve dhe pajtimi i ndërsjellë dhe do të sjellë përfitime për qytetarët në jug dhe veri të Mitrovicës”, thuhet në deklaratën e saj.
Mogherini deklaroi se liderët në rajon janë duke treguar guxim dhe vizion me shembjen e mureve dhe ndërtimin e urave për normalizimin e marrëdhënieve midis tyre.
“Hapja e urës së rivitalizuar të Mitrovicës dhe përfundimi i shndërrimit të rrugës ‘Mbreti Petar’ në zonë për këmbësorët në të ardhmen e shpejtë do të jetë një arritje e rëndësishme në implementimin e marrëveshjes të arritur për dialogun”, thuhet në deklaratë.
Më tej Mogherini shton që “… Përparimi i normalizimit të marrëdhënieve mes Kosovës dhe Serbisë është më shumë se kurrë me rëndësi të madhe për ruajtjen e paqes dhe stabilitetit ndërmjet të dyja palëve dhe në rajon dhe po ashtu është vendimtar në përparimin e tyre drejt BE-së”.
