16 janari afati i fundit për paraqitjen e dosjeve. Ligji i ri detyron kandidatët të marrin mbështetjen e kolegëve.
Asnjë kërkesë nuk ka mbërritur ende në kutinë postare të Kuvendit të Shqipërisë, nga kandidatët për anëtarë të Këshillit të Lartë të Prokurorisë dhe Këshillit të Lartë Gjyqësor. Procedura për aplikimet është hapur dy ditë më parë dhe afati përfundimtar është data 16 janar.
Ligji i ri parashikon që kandidatët për anëtarë të Këshillit të Lartë të Gjyqësorit dhe ata të Prokurorisë të sigurojnë nga dhjetë 
firma kolegësh, si kusht për të qënë kandidat për KLGj apo KLP.
Sipas ligjit, konkurojnë për anëtarë të KLGJ-së, tre gjyqtarë të Shkallës së parë, dy gjyqtarë të Gjykatës së Apelit dhe një nga Gjykata e Lartë. Secili prej tyre është i detyruar të mbledhë nga dhjetë firma në nivelet e gjykatave, për të cilat konkurojnë. E njëjta procedurë zbatohet edhe për anëtarët e Këshillit të Lartë të Prokurorisë, sipas nivele të këtij institucioni. 27.al është interesuar pranë prokurorisë, por edhe gjykatave për të mësuar se në cilën fazë është procedura e mbledhjes së firmave. Sipas burimeve ka një aktivizim të konsiderueshëm të shumë prokurorëve dhe gjyqtarëve për të marrë besimin e kolegëve të tyre dhe për t’u paraqitur si kandidatë për KLGJ e KLP, pranë Kuvendit. Por, deri tani, nuk ka emra konkretë që të kenë garantuar firmat e kolegëve të tyre për t’u bërë pjesë e këtij konkurimi për anëtarë të KLGJ-së dhe KLP-së. Nga burimet pranë Kuvendit, konfirmohet se ende nuk ka asnjë dosje të mbërritur në kutinë postare të Kuvendit, atje ku dorëzohen dosjet e kandidatëve.
Dy ditë më parë, Kuvendi i Shqipërisë deklaroi hapjen e procedurave të konkurimit nëpërmjet këtij njoftimi: Bazuar në nenet 276 dhe 279 të ligjit nr.115/2016 “Për organet e qeverisjes së sistemit të drejtësisë”, gjyqtarët dhe prokurorët e interesuar për pozicionin e anëtarit të Këshillit të Lartë Gjyqësor dhe të anëtarit të Këshillit të Lartë të Prokurorisë, brenda datës 16.1.2017, duhet të depozitojnë edhe pranë Sekretarit të Përgjithshëm të Kuvendit një kërkesë, ku shprehin interesin për të kandiduar, si dhe një kopje të dokumentacionit që kërkohet për rivlerësimin, sipas ligjit nr.84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”.
Dokumentacioni duhet të dërgohet në adresën postare të Kuvendit.
