Policia e Lezhës ka publikuar pamjet e sherrit në Shëngjin, kur një person hyn në ambientet e një lokal dhe nis të konfliktohet. Sipas Policisë në pranga kanë rënë dy persona, ndërsa është sekuestruar një pistoletë me municion luftarak dhe një dorezë metalike. Kujtojmë se sherri ka ndodhur mes dy personave dhe një ish-efektivi policie për shkak të një vendi parkimi. Të arrestuarit pasi janë konfliktuar me ish-efektivin e kanë kërcënuar atë.
Të arrestuarit janë E. M., 29 vjeç dhe E. S., 25 vjeç, banues në Shëngjin, të cilët ishin strehuar në një banesë. Pas kontrollit të ushtruar në banesë dhe kontrollit fizik të tyre, u gjetën dhe u sekuestruan në cilësinë e provës materiale një dorezë metalike dhe një armë zjarri pistoletë me krehër, e cila dyshohet të jetë pistoleta e përdorur për kanosjen e ish-policit Gj. M.
Materialet në ngarkim të tyre i kaluan Prokurorisë pranë Gjykatës së Shkallës së Parë Lezhë, për veprime të mëtejshme.
