Vetvrasje politike e ka cilësuar Astrit Patozi, një marrëvshje të mundëshme të PD-së me LSI-në. Në një intervistë për “Panorama”, deputeti i Partisë Demokratike, ish-kryetar i grupit parlamentar të kësaj partie, analizon situatën politike në vend. Ai thekson se protestat popullore janë e vetmja mundësi që vendi t’u drejtohet zgjedhjeve të parakohshme.
“E kam thënë edhe më parë dhe i qëndroj bindjes sime se çdo shkelje syri në distancë apo afërsi e jona me Ilir Metën, do të ketë pasoja të rënda në radhë të parë për vetë Partinë Demokratike”
Për Patozin aleanca me LSI-në duhet të jetë në çdo rast e përjashtuar për PD-në. “Qofsha i gabuar, por ngjan se një koalicion pazaresh e ka të vështirë të prishet përfundimisht sa kohë që i kujtohet se ka diçka për të ndarë. Ndaj këto ftohje-ngrohjet e Ilir Metës me Edi Ramën janë më shumë hakërrime dhe testim forcash në një rivalitet të egër politik brenda së majtës, ku PD-ja po përdoret si garniturë kërcënuese, por jo si një kërcënim për pushtetin vetë. Siç, në fakt, i takon të jetë.
Deri më sot nuk ka ndonjë deklarim publik të zotit Basha që e lë të hapur mundësinë për një koalicion të PD-së me LSI-në, ndaj edhe nuk e shoh të arsyeshme të komentoj për pyetjen e tuaj. Unë e kam thënë edhe më parë dhe i qëndroj bindjes sime se çdo shkelje syri në distancë apo afërsi e jona me Ilir Metën, do të ketë pasoja të rënda në radhë të parë për vetë Partinë Demokratike”, thotë Patozi.
