Gazetari Berat Buzhala beson se zgjedhjet e 25 Prillit i fiton opozita dhe ditën e hënë kryeministër do të jetë Lulzim Basha. “Unë besoj se Rama nuk do të jetë Kryeministër pas të hënës. Asnjëherë s’e kam parë qytetarin shqiptar më me shumë ankth se kaq për zgjedhjet.
Edhe taksisti edhe kamerieri më shikojnë dhe më thonë; Apo largohet ky? Shqipëria nuk duhet të prishë praktikën e pashkruar që pas 8 viteve pushteti duhet ndryshuar”,- tha ai. Por ka një frikë. “Shpresojmë që të mos deformohet vota”.
Gazetari i njohur ka një këshillë për qytetarët shqiptarë. “Mos vendoset vota me çfarë është thënë në dy javët e fundit, por çfarë është bërë në 8 vitet e fundit. Në 4 vitet e fundit, Shqipëria ka rënie me të gjithë matësit që vlerësohen shtetet”.
Ftesën e Ramës për Bashën për bashkëpunim pas zgjedhjeve, Buzhala e cilëson si makinacion të kryeministrit. Por, a duhet të ketë një koalicion PS-PD? “Do të ishte fatale për Shqipërinë. E përjashtoj. Si pikë e parë nuk do të jetë nevojë, mes një koalicioni me PS dhe një me LSI, Basha do të zgjedhë LSI-në, pasi do të jenë të mjaftueshme, pasi shqiptarët nëse votojnë për ndryshim” tha ai.
Një letër e kryeministrit slloven për rishikimin e kufijve të Ballkanit riktheu edhe një herë debatin në rajon, ndërsa kryeministri Edi Rama tha që e kishte parë dhe diskutuar me Janez Jansha. Buzhala thotë që nuk ka gjë më të sigurtë se të fillosh një luftë duke propozuar një ide të tillë, pra rishikimin e kufijve.
“Ideja e këmbimit të territoreve, nuk ka gjë më të sigurtë se të fillosh një luftë duke propozuar një ide të tillë. Çmenduria më e madhe është që shqiptarët me kërku më shumë sesa kanë tash. Unë jam i bindur që Rama nuk e njeh as hartën e Kosovës. Ai e ka publikuar në faqen e tij në facebook një hartë të Kosovës që është pjesë e Serbisë. Ndoshta edhe ka parë diçka, por nuk e di cila është harta reale, Rama ka qenë i manovruar, pasi Thaçi ka patur interes me notu në këtë proces. Kur flet Rama për veriun e Kosovës nuk e di çfarë përfshinë” tha ai.
Pak ditë më parë presidenti serb, Vuçiç duke folur për zgjedhjet në Shqipëri tha se Basha dhe Berisha duan Shqipërinë e Madhe. Për këtë përfshirje të tij, Buzhala theksoi: “Më shumë është sabotazh i Vuçiç. Vuçiç e ka thënë për të frikësuar ndërkombëtarët, unë nuk besoj që Basha e ka në agjendë atë temë”,- përfundoi ai.
