Nga Alket Veliu
“Nacional-socialisti” Rama, nga Saranda, i ka kujtuar komunitetit çam se ka qenë PS që ka mbrojtur interesat kombëtare, duke sulmuar fort kryetarin e PDIU-së, Shpëtim Idrizin, me shpresë se çamët do ta ndjekin nga pas.
Sigurisht që për zotërinë në fjalë “mbrojtje e interesave kombëtare” do të thotë bindje dhe përunjësi e verbër ndaj Athinës, tradhti ndaj Çështjes Çame, heqje e saj nga programi i qeverisë dhe i partisë, heqje e emrit “Çamëri” nga tekstet shkollorë dhe ndryshimi i toponimeve. Kështu është shpërblyer vota që i dhanë dikur çamët, kur dërdëlliste si nacionalist i thekur se “Akropoli i lashtë nuk do të qëndronte në këmbë pa shqiptarët” dhe përbetohej si mbrojtës i flaktë dhe besnik i Çështjes Çame. (Edhe parrulla që hodhi dikur Hitleri për SS ishte: “Nderi im e ka emrin besnikëri”( Meine Ehre heist Treue).
Por, njerëz të tillë nuk mund të mbajnë mbi shpinë kauza kaq fisnike. Si duket kanë frikë se mund t’i bëjë gungaçë. Ata e kanë më lehtë t’i lëpijnë duar e këmbë Greqisë, me shpresë se mos mbeten dhe ca kohë në pushtet. Dhe këtë tashmë e dinë mirë jo vetëm çamët, por gjithë shqiptarët.
Dikur PDIU ishte e domosdoshme për Ramën, megjithatë atij s’i shqitej nga mendja ideja për ta zhdukur nga skena politike dhe për t’i nxjerrë përpjekjet për Çështjen Çame nga rrjedha e saj, duke intensifikuar luftën në të gjitha frontet. Ky racizëm individualist dhe abstrakt i pëlqeu padyshim edhe Athinës zyrtare, e cila gjeti rastin të avanconte me grabitjen e detit dhe çështjen e varrezave të ushtarëve pushtues grekë.
Në fjalën e tij në Sarandë Rama, në ekstazë, ka thënë se marrëdhëniet me Athinën zyrtare janë sot në nivel shumë të lartë, edhe pse nga ana tjetër deklaroi se qëndrimi i Tiranës ndaj Athinës ka qenë i prerë dhe “nuk ka ulur pantallonat” si qeveritarët e dikurshëm. Kjo është e kuptueshme, pasi kryeministri ynë i (ç)nderuar nuk ka fare pantallona, ai është “mbreti-lakuriq”, që i ka dhënë me koncension edhe të poshtmet, bashkë me Çështjen Kombëtare.
Hapja e një fronti të ri politik kundër forcave kombëtare progresiste, ku në krye të cilave është PDIU, është shprehja më e qartë e politikës së dëshpërimit. Gjatë dërdëllitjeve në Sarandë Rama doli nga lëkura e vet, ashtu si gjarpëri pasi ka gëlltitur vezët nëpër pullaze.
Sondazhet i thonë se PDIU mbetet një forcë me peshë të ndjeshme elektorale në 5 qarqe, sidomos në Qarkun Vlorë- Sarandë nga ku Rama intesifikoi sulmin e vetë ndaj kësaj force.
Më në fund ai ka filluar të ndërgjegjësohet për forcën elektorale të kësaj partie, me një pasaportë të vërtetë atdhetarie e humanizmi, mbrojtëse e të vërtetave reale përfaqësuar denjësisht nga Shpëtim Idrizi. Dhe pikërisht e vërteta e së vërtetës i djeg Ramë mavrisë.
