Kryeministri Edi Rama në konferencën e fundvitit me gazetarët, përsa i përket sigurimit të vaksinës tha që punën për të lypur për vendin e bën me së miri, kur u shpreh: “Më falni për modestinë, por kur vjen për të lypur për Shqipërinë jam njish”.
Më tej, ai tha se në mes të muajit janar do të vaksinohen të parët mjekët e infermierët dhe më pas do vijohet me grupet e tjera, siç janë mësuesit, policët dhe të moshuarit.
Pastaj vazhdoi duke bërë një sqarim shumë konfuz se si do të arrinte tek vaksina: “Dua tju bëj me dije se kompanitë, duke nisur nga kompani si Pfizer bëjnë marrëveshje, të cilat sidoqoftë janë të lidhura me shtetet, pra nuk ka një marrëveshje tani, e cila bëhet drejtpërdrejt me kompaninë e në mënyrë bilaterale. Ti blen sipas asaj që ofron.
Por, marrëveshja është e lidhur me shtetet, me të cilat Pfizer ka vendosur vijat e para të komunikimit, kur them shtetet, kam parasysh BE-në në këta rast si një entitet i tërë.
Nga ana tjetër në SHBA, ku është baza më e madhe prodhuese ka një ndalesë me një akt të presidentit që asnjë dozë nuk mund të dalë nga SHBA.
I gjithë ky ngërç i takon vetëm fazës së parë, se prodhimi do rritet në muajt në vijim.
Megjithatë ne jemi të bindur që do fillojmë vaksinimin pa pritur që të kalojmë ose të kalojë ky ngërç.
Do nisim brenda janarit e unë kam tendencë të besoj që në mes të janarit ne do jemi në gjendje të nisim vaksinimin duke bërë të njëjtën gjë si të gjithë me mjekët e infermierët e duke u shtrirë me mësuesit, punonjësit e policisë e ata që janë më të moshuarit.
Jemi në diskutime edhe me Astra Zeneca edhe me Moderna dhe besoj që shumë shpejt do finalizojmë edhe marrëveshjen me Pfizer që lidhet me kapacitetet që janë në shtete të ndryshme”.
