Kreu i opozitës, Lulzim Basha deklaroi se kryeministri Edi Rama ka dështuar në menaxhimin e pandemisë.
Në një komunikim për mediat, Basha theksoi se ministrja e Shëndetësisë Ogerta Manastirliu po mundohet të mbulojë sipas saj dështimin e kryeministrit.
“Dua të dënoj maskaradën që po zhvillohet aktualisht në Parlament. Ministrja e Shëndetësisë po mundohet të mbulojë dështimin e Edi Ramës me situatën e pandemisë. Siç e dimë fare mirë nuk kanë shfaqur të vërtetën. Situata e pandemisë në Shqipëri mbahet e fshehtë për shkak se Edi Rama ka humbur kontrollin e menaxhimit. Rama dhe Manastirliu fshihen pas sakrificës së mjekëve. Është shumë e lehtë t’ja japësh përgjegjësinë qytetarit, të fshihesh pas gjobave, kur vetë nuk ke bërë asgjë. Ai e ka ndarë mendjen që këtu të bëhet kërdia dhe të mos ndalë asnjë çast mbushja e xhepave të veta. Të lërë në mëshirë të fatit edhe pacientët e sëmurë me COVID, të vdesin në trotuare. Prej 5 javësh e kemi paralajmëruar të marrë masat e duhura dhe nuk është marrë asnjë masë”, tha Basha.
