Nga Erges Eskiu
Nuk e di a mund të heqim paralele midis fundit qeverisë së Nanos dhe të Edvinit, por sot m’u kujtua si një deja-vu 9 janari i 2004-s, tek shihja (prag) krizën humanitare në Kakavijë dhe (mos) reagimin të Rilindjes, që më shumë se cinik duhet thënë është kriminal.
Drama në kufirin me Greqinë më kujton tragjedinë 9 janarit 2004, ku u mbytën 28 vetë dhe kryeministri i asaj kohe vazhdonte pushimet në shtetin helen, pa denjuar t’i linte ato e të kthehej me aeroplanin më të parë.
Sot, një dramë tjetër shfaqet në ditët e fundit të pushtetit të majtë në Shqipëri dhe sërish kryeministri vazhdon pushimet pa e prishur terezinë, për të dëshmuar edhe një herë pandjeshmërinë e tyre ndaj qytetarëve që “qeverisin”.
Pas sondazheve të përjavshme që e nxjerrin pashmangshmërisht humbës përballë sfidantit të tij, Lulzim Basha, kryeministri e ka pranuar verdiktin popullor dhe tashmë kjo duket qartë nga fakti se është energjikisht i ezauruar, ndaj nuk bën as përpjekjet më të vogla për t’i dhënë zgjidhje situatës, qoftë edhe për efekt propagandistik.
Nëse BE-ja ka mbyllur kufirin tokësor, detar e ajror për shqiptarët kjo vjen për faktin se shteti shqiptar ka dështuar në administrimin e pandemisë!
OBSH thotë se Shqipëria ka mesatare shumë shumë më të lartë se vendet e BE-së për rastet e reja me COVID-19. Aktualisht, janë 3000 raste aktive në vend. Janë 60 raste të reja në 100 mijë banorë, ndaj Greqia sot ka vendosur rregulla të reja për pranimin e udhëtarëve nga Shqipëria, pasi ajo e njeh shumë mirë (mos) administrimin e pandemisë, që ka bërë qeveria shqiptare.
Me gjithë izolimin ekstrem, të cilin urdhëroi kryeministri për tre muaj me radhë, për të fshehur mungesën e gadishmërisë dhe të gjendjes mesjetare, ku e ka çuar shëndetësinë si rrjedhojë të pangopësisë së vet për të vjedhur, Shqipëria sot me numrin më të ulët të testimeve, ka mesataren më të lartë të rasteve të reja krahasur me fqinjët dhe BE, ndaj mbyllja e kufijve vjen si reagim vetëmbrojtës i shtetit grek prej rrezikut, që u kanoset nga papërgjegjshmëria e qeverisë së Tiranës.
Qeveria greke i druhet hyrjes së njerëzve potencialisht të infektuar, gjë e cila do t’i shkaktonte probleme të mëdha shtetasve grekë, sistemit shëndetësor dhe ekonomisë së vendit fqinj, ndaj sot të gjitha shigjetat duhen drejtuar drejt qeverisë shqiptare, e cila ka dështuar dhe nuk po u jep zgjidhje qytetarëve të saj duke i lënë në pikun e vapës, në një hapësirë të mbipopulluar dhe të papërgatitur, çka rrezikon të kthehet në një vatër të madhe infeksioni dhe në humbjen e dhjetëra e qindra jetëve njerëzore.
Sot, minimalisht ministri i jashtëm, njëkohësisht kryeministri vendit, ministri i brendshëm dhe ministrja e shëndetësisë duhej të jepnin dorëheqjen, nëse do kishin fijen e dinjitetit njerëzor, por kjo është diçka që ata nuk e njohin e nuk e kanë patur kurrë.
Sot, po bien maskat dhe kuptohet se pas maskave çfarë bie?!
