Në monologun e tij të së martës në “Provokacija” Mustafa Nano ka komentuar incidentin me kreun e Policisë së Shtetit, Ardi Veliu.
Ky i fundit gjatë raportimit në Këshillin e Sigurisë, u tregoi anëtarëve pamje me pistoletë në dorë të nënës së 15-vjeçarit që u dhunua nga policia. Ky veprim i Veliut ka ngjallur debat, ndërsa Nano shprehet që kreu i policisë duhet të ishte dorëhequr.
“Kryepolici i Republikës nuk paska mësuar një gjë minimale: Askush nuk mund të penalizohet për shkak të biografisë familjare. Përgjegjësia është individuale. Çdo berr varet prej këmbëve të veta”, u shpreh Nano mes të tjerash.
Nano shton më tej që Veliu nuk e dha dorëheqjen, por kërkoi ndjesë, që siç thotë ai mbase i është kërkuar nga kryeministri Rama që ta bëjë. Lidhur me këtë moderatori i drejtohet kryeministrit që nuk duhet të krijojë precedentë.
