Shpresa e vetme janë bluzat e bardha

Nuk e di se ç’do të thotë të jesh mjek.
Nuk e di se ç’do të thotë të bësh roje.
Nuk e di se ç’do të thotë të të vdesë një pacient.
Nuk di shumë gjëra, por ama diçka e di me siguri;
-Apelit të mëposhtëm do t’i isha përgjigjur pozitivisht-.
Sikundër i jam përgjigjur pozitivisht, apelit për të shkruar artikuj, ndonëse nuk jam gazetare dhe apelit në mbrojtje të artit, ndonëse nuk jam artiste.
Vendi ndodhet në një situatë shumë të vështirë.
Kjo është koha për të vepruar. Shpresa e vetme janë bluzat e bardha.
Elona Caslli
……………………………………………………………………….
Apeli i mëposhtëm vjen nga prof.Arben Gjata, Rektor i Universitetit të Mjekësisë, Tiranë.
I dashur student,
Në këtë apel që të drejtohet ty, ti nuk je më një student në Fakultetin e Mjekësisë, në Fakultetin e Infermierisë ,të Farmacisë apo të Shëndetit Publik.
Ti je koleg. Nuk je kolegu im. Nuk je as kolegu i pedagogëve të tu.
Je kolegu i jetës së çdo shqiptari.
Sot më shumë se kurrë, sytë e çdo shqiptari janë kthyer drejt nesh.
Sot më shumë se kurrë, jemi përgjegjës për të nesërmen.
E nesërmja je ti!
Ke në dorë ta mjekosh të nesërmen, me praninë tënde!
Kudo qofsh, vishe bluzën e bardhë dhe eja!
Eja, të luftojmë së bashku!
Eja, të lodhemi së bashku!
Eja, t’i këmbejmë turnet së bashku!
Eja, të themi që ia dolëm së bashku!
Sinqerisht,
Arben Gjata
https://mjeke.shendetesia.gov.al/
http://infermierepershqiperine.al/