Vetëm pas tri ditë dhe do të kemi përsëri një derbi Tirana – Partizani, i katërti dhe i fundit në këtë sezon. Ndërkohë që ka disa arsye për ta cilësuar si ndryshe atë 90 minutësh, që gjithsesi mund të përcaktojë shumë për fatet e sezonit, madje jo vetëm për dy kundërshtarët që do të ndeshen, por edhe të tjerëve që kanë interes direkt për rezultatin e tyre. Së pari do të luhet të mërkurën dhe sipas një njoftimi paraprak jo në mbrëmje, pra në një orar të papërshtatshëm për tifozët në mesjavë. Ndërkohë që në “Selman Stërmasi”, rivalët e përjetshëm këtë rradhë nuk vijnë si të barabartë. Bardheblutë vendas po kalojnë momentet më të vështira dhe i janë larguar ndjeshëm zonës së Europa League, objektivi i vetëm i mbëtur për skuadrën e Dajës.
Ndërsa një tjetër humbje në derbi do të ishte e pafalshme nga tifozët, që edhe kështu vazhdojnë ta mbajnë të karikuar “gjendjen e luftës”. Në tre ndeshjet e fundit, Tirana nuk ka fituar asnjë përballje, madje nuk ka shënuar asnjë gol. Në të kundërt, Partizani që vazhdon të jetë në garë për titullin kampion ka marrë pikë të plota në 270 minutat e fundit dhe mbi të gjitha nuk ka pësuar asnjëherë. Por edhe formacionet e zgjedhura nga trajnerët do të jenë ndryshe. Agostineli i ka në dispozicion të gjithë futbollistët që i duhen, ndërsa Dajës do t’i mungojë pothuajse gjysma e skuadrës, duke filluan nga Karan, Smajli e Kërçiku në mbrojtje, si dhe në mesfushë Muzaka e Malaj. Tani mbetet të pritet edhe çmimi i biletave, pasi deri tani organizatorët e kanë pasur dorën shumë të rëndë.
