Nga Luljeta Progni
Kryeministri i Shqipërisë bëri sot një deklaratë të fortë në Kuvend, kur tha se policia ka kërkuar përgjim për Emiljano Shullazin dhe nuk e ka marrë lejen nga Prokuroria. Kryeministri ka sqaruar disa herë procedurën e ndjekur policia për arrestimin e Shullazit. Ai është përpjekur të bëjë me faj Prokurorinë, e cila sipas kryeministrit ka vonuar deri në mesnatë të lëshojë urdhrin e arrestit, ndërkohë që policia e kishte shoqëruar Shullazin. Duket e qartë bindja e kryeministrit se Prokuroria ka vonuar në lëshimin e urdhër arrestit, më keq akoma, ka refuzuar kërkesën për përgjim. Pra, kryeministri foli për një krizë të fortë në raportet mes policisë dhe Prokurorisë. Sipas tij, Prokuroria dhe policia dy institucionet ligjzbatuese të shtetit nuk bashkëpunojnë, pra rendi dhe siguria në vend nuk funsksionon. Kjo ishte një deklaratë e rëndë e thënë nga goja e kreut të qeverisë.
“Policia e ka ndaluar Shullazin dhe më pas ka kërkuar nga Prokuroria autorizimin për arrestim dhe e ka marrë pas mesnate, ndërkohë që personazhi në fjalë ishte në qeli. Është kërkuar autorizimi për përgjimin dhe nuk është arritur”, ka thënë Rama.
Por pak çaste pas tij, ministri i Brendshëm e përgënjeshtroi kryeministrin duke thënë se ishte një lapsus. “Ishte lapsus i kryeministrit, kur tha se prokuroria nuk ka pranuar kërkesën për përgjim. Por, e vërteta është se policia ka referuar çdo material”, tha Tahiri.
Ndërkohë kryeministri Rama e kishte përsëritur deklaratën më shumë se një herë, në replikë me Palokën e Topallin. Pra, nuk duket i besueshëm version i ministrit Tahiri, që kishim të bënim thjesht me një lapsus. Atëherë mbeten tri opsione:
Së pari, kryeministri mund të ketë marrë informacion të gabuar; së dyti nuk ka marrë aspak informacion nga institucionet apo personat e ngarkuar pranë qeverisë për këto çështje; së treti kryeministri keqinformoi publikun qëllimisht sot në Kuvend. Të trija opsionet janë një incident i rëndë me institucionin e kryeministrit. E para nëse ka njerëz që mund t’i japin me ose pa qëllim informacion të gabuar për një çështje kaq sensitive, e dyta kryeministri me arrogancë shkon në Parlament me informacion të cunguar ose fare pa informacion për çeshtje kaq të debatueshme dhe së treti kryeministri mund të ketë dizinformuar opinionin publik për rolin e institucioneve të rëndësishme siç është Prokuroria.
Në çdo rast është një “lapsus” i rrezikshëm i kryeministrit. Por, kjo është vetëm njëra anë e medaljes. Më e rënda është se Rama tashmë e ka konfirmuar publikisht mosbesimin reciprok polici-prokurori. Është edhe më e rëndë, sepse janë dy institucione, pa bashkëpunimin e të cilave, shteti nuk funsksionon dhe qytetarëve nuk u garantohet siguri publike.
