Nga Edison Ypi
5 Euro kushtojnë 8 bukë që hahen në një ditë nga 8 familje modeste shqiptare nga ato për të cilat restoranti është një shpikje e panevojshme.
5 Euro dalin e teprojnë për të blerë 2 kilogram fasule Korçe ose Dibre, që zjejnë shpejt, kanë proteina, hahen me qef të shoqëruara me kos.
5 Euro kushton karburanti për të bërë një shetitje në Kepin e Rodonit ose në Ishëm nëpër ca peisazhe përrallore me pyje, qiell, det, me të ik menia e kokës.
5 Euro në monedha të vogla mjaftojnë për të kënaqur mbi 20 herë violinistin e trotuarit që luan Çajkovskin dhe për t’i bërë qefin vetes si dashamir i Artit dhe mecenat.
Me 5 Euro mund të blesh një libër të vogël me disa nga perlat e Lasgushit, Introduktat e Nolit, ose novelat më fantastike të Ismail Kadaresë.
5 Euro mjaftojnë për t’ja zbukuruar ditën çdo fëmije të edukuar për së mbari, jo si ata që kanë për baba hajdutin Adriatik Llalla.
Më pak se 5 Euro kushton një program i thjeshtë kompjuterik me të cilin mund të shkarkosh gratis nga Interneti të gjitha kryeveprat e kinemasë botërore, sidomos ato të kohës së kurvit.
5 Euro kushton secila analizë mjekësore që do bësh në një laborator për tu bindur se; Mushkritë të kanë marrë fund qysh kur pije cigare Partizani, sytë po t’i fik kompjuteri, mendjen po ta torolleps propaganda, ngathtësinë e ke peshqesh nga sedentarizmi, dhjamosjen nga fast fudat, diabetin ta garantojnë ushqimet me brumëra dhe konservanta, origjinë dhe data skadimi të dyshimta.
Afërsisht 5 Euro do të kushtojë në një kafene qerasja e një miku që hiqet për filozof autodidakt i cili do të thotë se në Shqipëri mjekët nuk t’i hedhin sytë në dy raste; Kur je nën 30 vjeç si tepër i ri asnjë sëmundje nuk guxon të të afrohet. Kur je mbi 60 vjeç si tepër i vjetër, ke marrë fund, vuan nga gjithçka, s’të ruan dot as Zoti. Çudia është se këtë ta thonë edhe mjekë nën 30 dhe mbi 60.
Me 5 Euro mund të blesh dy konserva peshku me salcë tepër ë shijshme. Do kënaqesh kur ta kullufisësh konservën e parë. Por do gjesh belanë pasi të boshatisësh të nesërmen konservën e dytë. Për arsye që nuk i di asnjë mik, asnjë mjek, asnjë libër, asnjë internet, nuk do të zërë gjumi tërë natën me sytë në tavan duke u munduar të gjesh nëse kjo bela’ të gjeti për shkak të një dobiçllëku të prodhuesit në formën e një energjie artificiale dhe të rrezikëshme që vjen nga cironkat e konservës që s’dihet në cilët pellgje janë zënë, nga vaji që s’dihet nga cili dru e kanë nxjerrë, nga salca që s’dihet në cilin laborator është shpikur.
Nëse shpenzon 5 Euro për të blerë dhe lexuar të gjitha gazetat e një ditë, do të largohet çdo ndjeshmëri dhe do të jetë zhdukur çdo stres. Je çmendur.
Rreth 5 Euro kushton konsultimi me një dernatologe se të kruhen duart. Dermatologia do të japi 5 receta nga 5 Euro secila për myqe dhe antibiotiqe që s’kanë për të bërë asnjë efekt. Do vazhdojë kjo kurë e kotë derisa një ditë të bukur me diell Fieri dhe fllad Puke, do të vijë në mendje ideja gjeniale lër të blerë me 5 Euro 10 palë doreza llastiku për të larë enët, dhe ke shpëtuar përgjithmonë nga të gjitha krruajtjet, recetat, dermatologet.
5 Euro kushtojnë rreth 100 kardioaspirina që të ruajnë nga rreziku i infarktit për shkak të episodeve traumatike të përditshmërisë shqiptareske.
Mos i kurse 5 Euro për një magjistricë në një katund të Mallakastrës e cila pasi do të falenderojë me gjithë shpirt për 5 Eurot, do të tregojë fijepërpe mbi pëllëmbë të dorës në vendin e shqiponjave fatin e zvarranikut./Shqiptarja.com
