Kryetari i Partisë Drejtësi, Integrim dhe Unitet, Shpëtim Idrizi i ftuar në Report TV deklaroi se duhet reciprocitet mes Greqisë dhe Shqipërisë.
Ai nënvizon që të vdekurit grekë po trajtohen ndryshe nga shqiptarët e çamërisë, të cilët u vranë në pragun e shtëpisë.
“Deri sot pala shqiptare ka negociuar për grekët. Presidenti i Greqisë në 87, Papulias ka thënë se aty ku kemi varret kemi atdheun. Pse nuk i marrin familjarët? Që kur të mos jemi më këtu t’u thonë nipave dhe mbesave tona që ja aty ku kemi varret është atdheu ynë.
Minimalisht të vdekurit të trajtohen njësoj. Shqiptarët e çamërisë të vrarë jo në luftë por në pragun e shtëpisë së tyre duhet të paktën të zgjojnë ndjeshmërinë e Bushatit“, tha Idrizi.
Idrizi tha se shumë emigrant shqiptarë të cilët punojnë dhe jetojnë në Greqi rrezikojnë të mbesin pa pensione.
Në lidhje me deklaratën e Kryeministrit Rama, Shpëtim Idrizu u shpreh se, “në asamblenë e PDIU, Rama u shpreh se do ta kishte parësore çështjen çame, ndërsa tani e pash në ngërç”.
Kreu i PDIU u shpreh se pala shqiptare duhet të ketë kujdes që përpos heqjes së ligjit grek të luftës, “Greqia duhet të heqë të gjitha barrierat që sjell ky ligj. Duhet të hiqen të gjitha efektet e ligjit të luftës, ndryshe do të jetë në favor të Greqisë”.
“Është “pesë me hiç” nëse ligji i luftës hiqet me një traktat miqësie. Pasi edhe traktati i 1996 mbaroi dhe nuk pati asnjë vlerë.U takua Bushati me Kotzias në Kretë, i futën edhe një valle greke, pastaj erdhi edhe Kotzias në Korçë dhe asgjë nuk u mor vesh se çfarë u diskutua. Ne i marrim vesh gjërat nga pala greke, pas takimit të parë Kotzias-Bushati u vu në zbatim marrëveshja për kërkimin e varreve greke”, u shpreh Idrizi.
Si e shpjegoni ndryshimin e retorikës së kryeministrit?
“Çamëria ka përmasat 5 % më pak se kosova, është një fakt dhe ngjarje që nuk ka precedent në gjithë Europën, janë përzënë njerëzit nga shtëpitë e tyre. Kryeministri dhe ministri i Jashtëm duhet të kuptojë se ne jemi shtet. Grekët janë bllok, pozitë, opozitë. Ne kemi 105 vite shtet dhe nuk kemi një vijë të përbashkët interesi. Ky është handikap i madh i politikës së jashtme. Kryeministri tha se po diskuton të gjitha çështje por tashmë është në vështirësi. Pse ndryshuan pozicion, kur Bushati në Parlament u bë më çam se çamët? Nuk është çështja çame në vullnetin e askujt, që do njëri ta marrë dhe tjetri ta lërë. Të gjitha forcat politike thonë se janë dakord, por askush mos të mendojë se këtë mund ta marrë dhe ta lërë sipas dëshirës“, vijoi Idrizi.
“Është turpi dhe nderi i kësaj qeveri se si e trajtojnë çështjen çame. Çështje rëndë, padrejtësi e rëndë që i është bërë shqiptarëve, njësoj si Kosova. Çamët nuk kanë një shtet me dinjitet që ti mbrojë. Shenjat nuk janë të mira, pasi kur del Kotzias, del i qeshur ndërsa Bushati del duke u përtypur. Ka që nga 2009 deri më sot që negociatat ishin të ngrira, për çfarë u shkrinë? Për çfarë u shkrinë për shkak të nevojës së një vetoje nga Greqia. Ne me Greqinë nuk jemi të vetëm në këtë botë. I kam kërkuar ministres së mbrojtjes që të ngrejë në Ministerialin e Natos çështjen Çame. Jemi dy vende anëtare të NATO që kanë një ligj lufte me njëri tjetrin“, u shpreh Idrizi.
