Nga Rafael Shabani
Keni dëgjuar për Valbonën? Përveçse keni bërë like fotove nëpër faqet e internetit, realisht e dini që ndodhet në skajin më verior të Shqipërisë? Po që është ajka e bukurisë shqiptare? Piktura më e bukur natyrore e jona?
Për të shkuar atje janë 2 rrugë. Njëra nga Shqipëria e tjetra nga . . . Kosova.
E para mallkoni veten dhe Zotin që gjithë atë mrekulli e ka katandisur nëpër atë rrugë qe duhet për të shkuar.
Do kalosh superstradën e vdekjes Tiranë – Lezhë, ku duhet të ruhesh nga parakalimet nga krahu i pasagjerit dhe ndalimet nga krahu i shoferit në mes të autostradës.
Pastaj do marresh rrugën për tek hidrocentrali i Vaut të Dejës, rrugë e cila duhet të shpallet kampion për shkatërrimin e automjeteve. Rruga më mizerabël në komplet rruzullin tokësor. Aty je i vetëdijshëm që makina po të mallkon me gjithë zemër.
Pastaj do shkosh me traget deri në hidrocentralin e Fierzës. Udhëtim fantastik, ama për t’u bërë vetëm 1 herë në jetë, sepse të vijnë zorrët në fyt nëse e bën shpesh.
Më pas, për 40-50 min je në Valbonë. Kohëzgjatja totale nga Tirana e gjithë kësaj rruge diku tek 8 orë. Pa ndalesa. Sfilitje totale.
Ndërsa nga rruga e Kosovës, e Kombit, për 3 orë e 30 minuta maximumi, je në Valbonë, llogaritur dhe ndalesat e shkurtra rrugës.
Do thoni ju 10 Euro s’janë asgjë për të vizituar Kosovën. Po për vetë vendin tënd? Të vizitosh Shqipërinë tënde, këtë Shqipëri ku çdo 2 orë rrugë ke një kufi shtetëror të paguash para për ta parë? Po a s’dëmtohet vetë vendi yt përpara se t’dëmtosh fqinjin ?
Ajo taksë rruge ndan Shqipërinë në mes, përpara se të forcojë kufirin me Kosovën.
Nuk ka lidhje jugu me veriun për nga bukuria. Le t’jetë plazhi i jugut më i mirë apo ku di unë, ama pa vizituar veriun nuk e formon dot idenë e vërtetë se ç’është Shqipëria. . .
E këtu s’bëhet fjalë vetëm për turizem. Është shumë më shumë. . .
https://www.facebook.com/rafael.shabani.5?hc_ref=ARSWnXqr59yU3IK9sk64v6u9DhlJGBKaHurXu6FDCgppozqwF7vtAicN3CiVMvuVm5M&fref=nf
