Analisti Artur Zheji thotë se ka një dakordësi mes Bashës dhe Berishës për të mos u krijuar grupime apo fraksione. Zheji shtoi se tashmë ata kanë nisur bisedimet, duke shtuar se Basha ka bërë hapa pas. Ai gjithashtu tha se Basha do të marrë pjesë në garën për kryetar të PD.
“Për fjalët e korridoreve, mendoj se ka një dakordësi mes Bashës dhe Berishës për të mos lejuar copëtimin e mëtejshëm të PD. Për të mos krijuar grupe apo fraksione. të grupi i Rithemelimit është vetë ustai dhe nuk del njeri nga gardhi. Por te PD ka një tendencë fraksionimi. Për të mos ndodhur kjo ka filluar në dijeninë time, sipas fjalëve të pakonfirmuara, por besoj që kanë një lloj peshe, bisedime për të ndalura këtë proces dhe për të shkuar drejt bashkimit të PD me Bashën një hap pas dhe me Berishën një hap para. Basha do të marrë pjesë në garën për kryetar të PD. Duke pasur parasysh statutin e ri të grupit të rithemelimit, do kemi gjëra të çuditshme të reja dhe interesante” – tha Zheji.
Ndërkohë nga ana tjetër, ish-deputeti i Partisë Demokratike dhe ish-presidenti i Shqipërisë, Bamir Topi është shprehur se Berisha është rikthyer tek prona e tij politike. Sipas Topit, opozita duhet të dalë nga konteksti i të qenurit të një grupi apo personi dhe se PD ka nevojë për njerëz që kanë karakter, pa kërkuar asgjë asnjëherë, që sipas tij janë më shumë jashtë se sa brenda sot në PD.
“Ai është rikthyer te prona e vet politike, te PD. A e mban vetë, a ia lejon dikujt tjetër, ajo mbetet pronë politike e tij. Ne po merremi shumë me PD dhe kemi harruar të merremi me qeverinë. Koncepti i opozitës është shumë më i gjerë, kompleks. Nuk është thjesht modifikim mekanik. Mendoj që duhet të kryhet kjo fillimisht. Epiqendra e opozitës është te PD. Nga rrugëdalja që do të ketë PD duhet të ketë një vizion tjetër se si e ndërton opozitën. Opozita është te njerëzit. Është te substanca gri. Kam aq vite atje e madje tani po takoj më shumë njerëz që kanë qenë dikur dhe s’janë më dhe nuk e shohin fare veten te partitë politike. Suksesi i një opozitë që do të ndërtohet, do të jetë jo te ata që janë atë. Nuk e kam besën te ata. E kam besën te ata njerëz që kanë karakter, të mbështesin politikisht, pa kërkuar asgjë asnjëherë. Këta janë më shumë jashtë se sa brenda” – u shpreh Bamir Topi.
