Kreu i Komisionit Qendror të Zgjedhjeve, Ilirjan Celibashi, ka deklaruar ditën e sotme se vazhdojnë hetimet për denoncimet e bëra në lidhje me zgjedhjet e 6 marist, kur u votua për kryetar në 6 bashki të vendit. Përmes një postimi në faqen zyrtare Celibashi tregon se së fundmi po merren në shqyrtim provat e paraqitura nga “Qëndresa Qytetare”, janë përfshirë shkelje të bëra nga kryetarja aktuale e Bashkisë së Durrësit, Emirjana Sako dhe gjithashtu edhe përfaqësues të tjerë të administratës publike.
“Në mbledhjen e sotme publike filluam shqyrtimet administrative të denoncimeve të Organizatës “Qëndresa Qytetare”, për shkelje të parashikuar në vendimin nr. 9, datë 24.12.2020 të Komisionit Rregullator në Komisionin Qendror të Zgjedhjeve, ndaj Autoritetit Portual Durrës, Drejtorit të Shkollës 9- Vjeçare “Armath” dhe kandidatit për kryetar bashkie në bashkinë Durrës, propozuar nga subjekti zgjedhor “Partia Socialiste e Shqipërisë”, si edhe të tjera shqyrtime të denoncimeve nga subjekte zgjedhore parti politike kundër Bashkisë Durrës dhe Rrogozhinë”, shkruan Celibashi.
Ndër të tjera, bëhet me dije se pjesë e provave të paraqitura ishin edhe shkelje të pretenduara të kryera nga bashkia Rrogozhinë. Celibashi tha se vendimi për këto shkelje të bëra, do të merret në seancën e ardhshme që do të jetë publike. “Dëgjuam gjerësisht pretendimet e përfaqësuesve të Organizatës “Qëndresa Qytetare”, përfaqësuesve të partive politike në KQZ Shqipëri dhe përgjigjet e përfaqësuesve të institucioneve. Vendosëm administrimin e provave të paraqitura, përfundimin e shqyrtimit administrativ dhe vendimmarrja do të shpallet në seancën e ardhshme publike”, tha ai. Ndërsa shtoi se në përfundim të hetimeve KQZ do të publikojë rezultatet e saj dhe do të marrë masa.
