Zbulohen detaje të reja nga vrasja e trefishtë në fshatin Xibër të Klosit.
News 24 raporton se shkak i konfliktit tragjik mes dy vëllezërve Kujtim dhe Sali Dakuci dyshohet se ka qenë një gardh, ndonëse ky fakt nuk është konfirmuar ende nga organet e hetimit.
Ndërkohë konfirmohet se, vrasja ka ndodhur për çështje pronësie, ku Sali Dakuci ka qëlluar me breshëri plumbash vëllanë e tij Kujtim Dakuci, i cili është shtrirë në tokë i mbuluar në gjak.
Menjëherë pas ngjarjes, pasi djali 17-vjeçar Flogert Dakuci ka parë babanë e tij në tokë, ka ndërhyrë për t’i dhënë ndihmë, por është qëlluar edhe ai nga xhaxhai.
Mësohet gjithashtu se, babë e bir nuk kanë ndërruar jetë në vendngjarje, por për shkak të largësisë mes banesës dhe spitalit të qytetit, ata kanë ndërruar jetë gjatë transportimit.
Më pas, autori, pasi ka marrë vesh humbjen e dy jetëve, ka vendosur të vetëvritet.
