Nga Pranvera Vatoci
Me dhimbjen e një vajze Tropoje nga Bujani i Mic Sokolit e Shaban Binakit, si mbesë e Abdullah Hoxhës që në krye po i kujtoj Hashim Thaçit disa vargje të një kënge të historisë të 107 vjetëve të shkuar:
“Haj medet po ban Gjakova,
Sot po varet Abdulla Hoxha,
Haj medet po ban konaki,
Sot po varet Shaban Binaki”
Kjo këngë e histori, si mijëra të tjera për Malësinë e Gjakovës(Tropojën)e djemtë e saj në luftë me çdo okupator të Kosovës duket se nuk e kanë bindur Presidentin Hashim Thaçi as të përmendë verbalisht vendlindjen time, e cila siç u shpreh Daut Haradinaj ngelet trolli, buka e konaki i UÇK-së.
Ky fakt më tronditi jo për faktin se Tropojën nuk e begenisi një president kalimtar por për djallëzinë e përdorur për të deformuar historinë. Zoti Thaçi ti që injorove kontributin e Tropojës e tropojasve në luftën për lirinë e Kosovës a më thua ku ishin bazat e para strategjike të UÇK-së në Tropojë apo Hotel Rogner?!
A e din Zoti Thaçi historinë e vërtetë të trojeve tona? Nëse po, më thuaj z.President se nga e ka origjinënMic Sokoli, Ali Ibra, Bajram Rama, Abdullah Hoxha, Shaban Binaki, Bajram Curri, Hasan Prishtina, Col Delia, Haxhi Zeke Byberaj. Mirë këta nuk i mban mend po të paktën të kujtoheshe për Tahir Sinanin e Bylbyl Breçanin?!
Z.President. Historia e Kosovës nuk mund të kuptohet dhe as të ndahet nga kontributi i burrave të Malësisë së Gjakoves. Ndaj tentativa juaj aspak miqësore për të atrofizuar Malësinë dhe luftën e bujarinë e saj ndaj vëllezërve tanë të Kosovës vetëm sa të zvogëlon, të zbeh…!Ti vërtetë ke hyrë në histori, por historinë nuk mund ta ndryshosh. Dhe dije Z. President se historia të pranon nga dera por kur abuzon me të ajo te dëbon nga oxhaku. Dhe oxhaku është me blozë të zezë!
