Nga kjo e hënë (14 shtator) në RTV Ora dhe Ora News nis sezoni i ri televiziv, me rikthimin e emisioneve dhe nisjen e mjaft programeve të reja.
Për shkak të rrethanave ku ndodhet media, Presidenti i Ylli Ndroqi ka dhënë një mesazh, jo vetëm për stafin, por dhe shikuesit duke i siguruar se asgjë nuk do të ndalë.
“Shumë menduan se do të gjunjëzoheshim- shprehet Ndroqi-, por nga kjo javë gjithçka rikthehet edhe më vrullshëm. Ora Neës do të vazhdojë të sfidojë, jo vetëm të parët për lajmin e fundit, por do të ndjekë në detaj gjithçka kërkohet të mbahet e fshehtë, t’i jetë pranë çdo familje, të bëjë transparencë për atë çfarë ndodh pas vendimeve të pushtetit në shërbim të interesit publik.
Më tej Ylli Ndroqi shton: “Por, kjo situatë do na bëjë edhe më të fortë. Një eksperiencë që pak e kanë kaluar… sot jeni ju ata që treguat se themelet e forta të më shumë se një dekade më parë janë kthyer në një kështjellë të fortë të fjalës së lirë. E kjo më bën të mos ndalem. Ju ftoj të jeni edhe më kurajozë, të thoni atë që të tjerët e thonë nën zë. Të ngrini shqetësimet që shqiptarët kanë, por që mediat e tjera i lënë të fshehura në sirtarë për shumë arsye. Të gjithë kemi nevojë për këtë. Ndaj ju falenderoj!”.
