Dosja e vrasjes makabre të Jak Prengës në resortin luksoz ‘Golden’ në Durrës që është në pronësi të disa prej autorëve të arrestuar të grupit të Hajrajve do të kalojë për hetim në SPAK ose ndryshe prokuroria e Posaçme Anti-Korrupsion.
Dosja po bëhet gati nga Prokuroria e Tiranës dhe hetimet e mëtejshme do të vijojnë nga SPAK, që prej të hënës ku do të dorëzohen aktet administrativisht.
Jak Prenga u mor peng me dhunë në 17 janar në mes të Kamzës dhe më pas është transportuar për në resortin ‘Golden’ në pronësi të autorëve. Pengu është futur në resort me këmbët e tij dhe është torturuar në garazhin e këtij kompleksi për 7 orë. Më pas autorët e kanë nxjerrë nga garazhi të mbështjellë me qese duke e futur në një furgon. Me lopata në duar ata janë larguar me furgon për të groposur viktimën, trupi i të cilit ende nuk është gjetur.
Arsyeja e marrjes peng të 49 vjeçarit ka qenë një sasi kokaine prej 243 kilogram e padorëzuar nga vëllai i viktimës Astrit Prenga në Angli. Astrit Prenga shërbente si korrier i disa bandave.
Prokuroria ka kërkuar arrest me burg për 5 të arrestuarit e bandës së drogës në Durrës që rrëmbyen Prengën. Të arrestuar janë Bajram Hajri, Elton Hajri, Leonard Hajri (të tre vëllezër) dhe Olsi Turja dhe Festim Bezhdili, të cilët janë pjesë e bandës që ka kryer ekzekutimin e 49 vjeçarit.
Këta persona akuzohen për “Rrëmbim ose mbajtje peng e personit”, “Fshehje ose asgjësim i kufomës”, “Veprime që pengojnë zbardhjen e të vërtetës”, “Përkrahje e autorit të krimit”, të kryera në bashkëpunim dhe “Armëmbajtje pa leje”.
Lidhur me ngjarjen policia ka shpallur në kërkim edhe 3 persona të tjerë të dyshuar si bashkëpunëtorë me 5 autorët e grupit të Durrësit. Të shpallur në kërkim janë tre të rinj nga Shkodra, që dyshohet të jenë pjesë e “grupit të Dukagjinit”, dhe bëhet fjalë për Aldo Majnishta, 26 vjeç, Ardian Doçaj, 32 vjeç, dhe Artan Doçaj, 36 vjeç.
Sipas informacioneve vëllezërit Hajri kanë qenë thjesht ekzekutuesit e një porosie që vinte nga tjetërkush. Dhe bëhet fjalë për 4 porositës, 3 shkodranë dhe një vlonjat. Një prej tyre është vlonjati me dy emra, Gramoz (Dritan) Rexhepi, personazhi më i fuqishëm i botës së krimit në Vlorë dhe me një ‘Cv’ të pasur aktiviteti që shtrihet nga vendet e Bashkimit Europian (Holanda, Italia, Spanja, Belgjika), deri në Ekuador.
/Newsbomb.al
