Kryedemokrati Lulzim Basha e nisi fjalën e tij në çadrën e protestës me një minutë heshtje në nder të ish-kreut të policisë së Vlorës, Artan Cuku.
“Të dashur miq më lejoni t’ju ftoj ta nisim këtë të dielë, me një minutë heshtje për të nderuar kujtimin e një oficeri trim të Policisë së Shtetit, një luftëtari të paepur kundër krimit, një mbrojtësi të sigurisë dhe jetës së njerëzve, të flakur kundër ligjit dhe pa asnjë arsye, në mes të katër rrugëve, që u ekzekutua dje Artan Cuku. Cuku, shërbeu për dhjetra vite në Policinë e Shtetit, në detyra nga më të ndryshmet, ku më të rëndësishmet janë pa dyshim ato në Drejtorinë e Krimit në Tiranë dhe krye të policisë së qarkut të Vlorës. Një nga qarqet problematike sa i përket krimit të organizuar dhe në veçanti sa i përket drogës dhe trafikut të drogës.”– u shpreh Basha.
Kreu i opozitës e cilësoi të papranueshme heshtjen e Kryeministrit dhe Ministrit të Brendshëm për ngjarjen e rëndë.
“Kanë kaluar mbi 12 orë nga kjo vrasje makabre e stilit mafioz, shoqëria ka shprehur tronditjen e thellë, kolegët e oficerit të lartë të Policisë së Shtetit kanë shprehur shqetësimin e madh dhe revoltimin me faktin që një oficer i shërbeu ligjit dhe luftoi krimin u flak në rrugë pa asnjë mbrojtje nga krimi.
I vetmi që nuk ka reaguar, është shteti shqiptar.Nuk ka reaguar Ministri i Brendshëm, nuk ka reaguar kryeministri, njëkohësisht edhe deputeti i parë i qarkut në të cilin oficeri Cuku shërbeu si drejtor. Nuk kanë reaguar, nuk kanë gjetur kohën, nuk kanë gjetur fjalët, nuk kanë gjetur kurajon, nuk kanë gjetur dhe nuk kanë moralin të ngrenë zërin kundër dorës kriminale që goditi shërbëtorin e ligjit.
Sikundër, nuk kanë gjetur kohën të thonë një fjalë të vetme, as ata, as edhe miqtë e tyre, (që nuk lënë moment pa folur broçkulla pa fund) për 12 tonët e drogës të kapur në Përmet. Nuk flasin për drogën, nuk flasin për krimin, sepse për ta, krimi nuk ekziston, kriminelët në Parlament dhe në Bashki janë sajesa të fantazisë opozitare, ndërsa droga dhe problemi i madh i drogës është shpikje e opozitës për t’i nxirë faqen vendit.”- tha Basha.
