Ditën e sotme, ish-deputetja e PD-së, Albana Vokshi, ka sulmuar Kryeministrin Edi Rama duke e akuzuar se po tenton kapjen e Autoritetit të Mediave Audiovizive.
Vokshi u shpreh se Rama po merr nën kontroll një tjetër organ të pavarur me ligj.
Sipas saj, këto kandidime partiake synojnë marrjen e kontrollit të plotë prej Edi Ramës të AMA, e projektuar si gjykatë politike për ndëshkimin e gazetarëve dhe mbylljen e portaleve.
Deklarata e Vokshit:
Në kohën që Komisioni i Venecias ndodhet në Shqipëri për të mbledhur fakte mbi dy ligjet e censurës mediatike që kërkojnë të vendosin nën diktat edhe mediat online, Edi Rama po kërkon të vërë nën kontroll të plotë edhe institucionin tjetër kyç në zbatimin e ligjeve të censurës, Autoritetin e Mediave Audiovizive.
Përmes një procedure korruptive, Edi Rama po emëron në krye të AMA-s rrogëtarët e zyrës së tij.
Ligji përcakton si kriter të parë depolitizimin, jopartishmërinë e kandidatëve.
Por aplikantët janë vartës të Edi Ramës dhe Erion Veliajt, të paguar prej tyre si fjalim shkrues në Partinë Socialiste apo si këshilltarë në disa ministri.
Maklen Misha, mercenar i Edi Ramës dhe Erion Veliajt, synon të zërë vendin e lënë bosh nga i ati dhe të marrë drejtimin e AMA-s.
Këto kandidime partiake synojnë marrjen e kontrollit të plotë prej Edi Ramës të Autoritetit të Medias Audiovizive, e projektuar si gjykatë politike për ndëshkimin e gazetarëve dhe mbylljen e portaleve.
Edi Rama e ka jetike kapjen e mediave, sulmin dhe shantazhimin ndaj tyre, në mënyrë që gazetarët te heshtin për skandalet e përditshme të qeverisë së tij.
Përsa kohë Edi Rama do të vazhdojë të jetë në drejtimin e vendit, media është në rrezik, të drejtat e qytetarëve janë në rrezik, vendi është në rrezik!
https://www.facebook.com/partiademokratike/videos/179045746757743/?t=2
