Në një intervistë për Zërin e Amerikës Kryetari i Partisë Demokratike, Lulzim Basha tha se pjesëmarrja e tij në inaugurimin e presidentit të ri, Donald Trump është bërë me ftesë nga republikanët, duke hedhur kështu poshtë zërat se ai kishte blerë biletë për të qenë pjesë e ceremonisë.
“Jam ftuar në ceremoninë e inaugurimit dhe në ceremonitë e tjera festive me këtë rast nga anëtarë të mazhorancës të Partisë Republikane në Kongresin amerikan. Dje kam qenë i ftuar senatorit Ted Cruz, për ceremoninë e inaugurimit, kam marrë një ftesë të përbashkët nga kryetari i Komisionit për Europën dhe bashkëkryetari i komisionit për OSBE“, shprehet Basha.
“Ftesat janë ftesa, nuk janë bileta, janë të papaguara, janë të dërguara dhe jo të kërkuara. Unë jam i nderuar që i jam përgjigjur ftesave të përfaqësuesve të shumicës në Kongresin amerikan dhe të Partisë Republikane për të marrë pjesë në inaugurimin e Presidentit Trump”, tha Basha.
