Prokuroria e Krimeve të Rënda po heton për sekuestron e 340 hektarëve tokë me vlerë 240 mln euro. Prokuroria e Vlorës nisi fillimisht hetimi, ndërsa deri më tani janë regjistruar tre raste.
Sipas Prokurorisë:
Nga hetimet e Prokurorisë së Vlorës, skema e falsifikimit të dokumenteve në këto raste është realizuar nga i njëjti grup personash dhe ka krijuar dyshimet e arsyeshme se veprimet e kundërligjshme janë kryer në kuadër të grupit të strukturuar kriminal. Për këtë arsye, Prokuroria e Vlorës ka shpallur moskompetencën, duke ia kaluar aktet Prokurorisë për Krime të Rënda, e cila është përgjegjëse për hetimin e veprave penale në kuadër të grupit të strukturuar kriminal.
Në bazë të analizës së përbashkët ndërmjet Prokurorit të Përgjithshëm, z. Adriatik Lalla, drejtuesve të Prokurorisë së Vlorës dhe Prokurorisë për Krime të Rënda., u vlerësua që kjo e fundit të thellojë më tej hetimet e nisura nga Prokuroria e Vlorës, lidhur me këtë skemë të madhe fallsifikimi dokumentash pronësie në zona turistike.
Prokuroria e Vlorës, në hetimet e zhvilluara gjatë tre muajve të fundit, ka zbuluar skemë fallsifikimi dokumentash dhe ka marrë lejen e gjykatës për sekuestrimin e pasurive, si më poshtë:
- Në Palasë, Himarë, tokë me sipërfaqe 33 hektarë, në vlerë rreth 30 milionë euro
- Në Karaburun, Vlorë, tokë me sipërfaqe 220 hektarë, me vlerë rreth 110 milionë euro
- Në Zvërnec, Vlorë, tokë me sipërfaqe 89 hektarë, me vlerë rreth 100 milionë euro
Prokuroria e Vlorës ka krijuar dyshimet e arsyeshme se, në të tre episodet janë të përfshirë shtetasit nën hetim Pullumb Petritaj, Enkes Hysendhima, Blerina Dhrami, Rajmond Mezi, Donika Besimaj, Lefter Gjergji dhe Belona Seraj, të cilët, në bashkëpunim mes tyre, kanë konsumuar elementët e veprave penale: “Fallsifikimi i dokumentave”; “Shpërdorimi i detyrës” dhe “Pastrimi i produkteve të veprës penale”.
Prokuroria e Vlorës ka provuar se personat e mësipërm, në bashkëpunim mes tyre për një periudhe të gjatë kohore dhe në vijimësi kanë kryer më shumë se dy vepra penale. Nga mënyra se si janë kryer veprat penale, periudha kur janë kryer, rrethi i personave të përfshirë në kryerjen e këtyre veprave penale, vazhdimësia në kryerjen e veprave penale dhe qëllimi i përfitimeve materiale nga kryerja e veprave penale, rezulton se ky grup ka zhvilluar një formë të veçantë bashkëpunimi, që në kuptim të nenit 28 të Kodit Penal, përbën grup të strukturuar kriminal.
Në përbërjen e këtij grupi të strukturuar kriminal janë përfshirë zyrtarë lokal, të cilëve u janë ngarkuar detyra konkrete në lidhje me falsifikimin apo dhe regjistrimin e pasurive të paluajtshme, zyrtarë të punësuar pranë Gjykatës së Rrethit Gjyqësor Vlorë dhe pranë ZVRPP Vlorë.
