Gazetari Roland Qafoku, ka publikuar në profilin tij në faceboook, një video të rrallë të Mbretëreshës së bukur Geraldinë, në vitin 1938.
“Një video e rrallë e shoqëruar me audio e mbretëreshës së Shqipërisë Geraldina Apony në vitin 1938. Ajo qëndroi rreth një vit në fron dhe 63 vite të jetës i kaloi në ekzil. Mbërriti në Shqipëri me 28 qershor 2002 dhe vdiq në Tiranë me 22 tetor të atij viti. Nje figurë e jashtëzakonshme, e vlerësuar për bukurinë e saj me çmimin “Trëndafili i bardhë” i Budapestit, Geraldina Apony ishte një vajzë me baba hungarez dhe nënë amerikane që jetën e saj ia fali Mbretit Zog, por që froni i Mbretëreshës i shkaktoi vetëm dhimbje. Megjithatë kush e njohu, kush e studioi dhe kush dëgjoi për të, duhet të ketë rënë në dashuri me këtë figurë historike për Shqipërinë. Nuk doni ta besoni? Ka një fakt domethënës: Regjimi komunist e cilësonte Ahmet Zogun tradhtar, satrap, kriminel e gjithëfarësoj, por ama për Geraldinën e tij nuk tha asnjë fjalë. Ai regjim që i binte në qafë edhe Michael Jackson-it, këtë grua nuk e zuri kurrë në gojë, nuk e përgojoi dhe nuk e etiketoi. Ishte realisht diçka e rrallë”, shkruan Qafoku.
