“Ndërkombëtarët janë të mirëpritur për të kontribuar por jemi maturuar mjaftueshmërisht që gjërat t’i bëjmë vetë. Mbase, gjërat e impostuara kanë sjellë më shumë dëm se sa të mira”
Qëndrim surprizë vjen nga ministrja e Mbrojtjes Mimi Kodheli për reformën në drejtësi. Ajo është shprehur thuasje në të njëjtin qëndrim me opozitën për rolin e ndërkombëtarëve në këtë proces kryesisht atë të vetingut. Ja çfarë thotë Kodheli e pyetur për këtë rol të ndërkombëtarëve: “T’ju them të drejtën ne jemi maturuar mjaftueshmërisht që gjërat t’i bëjmë vetë. Është i mirëpritur çdo ndërkombëtar, çdo dashamirës, çdo institucion që mbështet dhe shtyn gjërat e mira në Shqipëri. Por, populli shqiptar ka një proverb shumë popullor dhe shumë aktual; i zoti e nxjerr vet gomarin nga balta. Ndërkombëtarët janë të mirëpritur të bëjnë gjithçka, por detyrat në qoftë se nuk i bëjmë vetë do të jetë thjesht dhe vetëm një artificë që nuk do të zbatohet kurrë. Mbase, gjërat e impostuara kanë sjellë më shumë dëm se sa të mira”, tha Kodheli në një intervistë për gazetaren Mimoza Picari në Oraneës.
Zonja Kodheli shprehet se duhen negociata për të respektuar mendimin e të gjitha palëve, pra të opozitës. “Duhet negociuar, duhet ulur, duhen respektuar të gjitha opinionet, duhen respektuar të gjithë protagonistët dhe aktorët e politikës shqiptare, të cilët sjellin në tryezë vlerësime dhe mendime të vlefshme. Kjo nuk do të thotë që njerëzit duhet ta besojnë këtë si një proces i thjeshtë, apo krejt normal”, thotë Kodheli.
Procesi i vetingut, është çështja që po vazhdon të mbajë peng miratimin e reformës në drejtësi. Opozita është shprehur kundër rolin vendimmarrës të ndërkombëtarëve në procesin e vetingut, pra të verifikimit të figurës së gjyqtarëve dhe prokurorëve. Opozita pretendon se me rolin vendimarrës të ndërkombëtarëve cënohet sobvraniteti i vendit. Duket se i të njëjtit qëndrim është edhe ministarje a Mbrojtjes Mimi Kodheli.
