Për Tironën dhe fanatiksat
Erion Veliaj nuk është i inatosur me tifozët e Tironës, të cilët pak ditë më parë nuk lanë gjë pa i thënë, madje thotë se është i gatshëm që t’ua shesë aksionet, nëse ata duan. Erion Veliaj deklaroi në “Shih programin” në TVSH se propozon modelin e Barcelonës, ndaj aksionet e Bashkisë në ekipin bardheblu i hedh në treg për tifozët. Por, kryetari i Bashkisë nuk është i gatshëm të mbyllë sytë dhe të hapë thesin. Pavarësisht, miqësisë me Presidentin e Tiranës, Refik Halili, Veliaj deklaron se nuk mund të administrohet klubi “me vesh”. Ai kërkon mbledhje të bordit drejtues dhe hapje të letrave mbi tavolinë. Problemin tek Tirana, Veliaj e sheh tek improvizimi, mungesa e strategjisë, dhe keqmenaxhimi. Duke iu kthyer rastit të futbollistit që kërkon 130 mijë euro pas prishjes së kontratës me Tiranën, për të cilën luajti vetëm 7 minuta, Veliaj ka zbuluar dhe një shifër alarmante borxhesh të mbledhura vetëm nga denimet për prishje kontratash. Janë mbi 1 milion euro dënime që rrijnë mbi kokën e aksionerëve të Tiranës. Ndërkohë në këtë situatë gri, ka edhe një rreze optimizmi. Veliaj njoftoi se ndërkohë Bashkia ka vendosur që të paguajë pjesën e saj për borxhet emergjente, siç janë ato në UEFA për të mos rrezikuar penalitetet ndaj skuadrës që mund ta degdisin në kategoritë inferiore. Gjatë javës pritet një mbledhje e bordit të aksionerëve të skuadrës dhe shumë pyetje ndoshta marrin përgjigje.
Për Blushin
Erjon Veliaj nuk e ka ndjekur dot të gjithë Asamblenë e Partisë Socialiste javën e shkuar për shkak të angazhimeve si kryebashkiak. Ai ka ndjekur vetëm fjalën e kryesocialistit Rama dhe kryerrobaqepësit të ndryshimeve statutore, Fatmir Xhafaj. Ndërsa për “fatin” e Ben Blushin, nuk ka patur kohë. Sidoqoftë zhurmën e bërë nga ky i fundit e cilëson si demokraci të brendshme dhe thotë se ndjehet i privilegjuar që aderon në një parti të tillë që i lë frymëmarrje dhe mendimit ndryshe. Lidhur me ngjarjen e Elbasanit ku u desh ndërhyerja e Gardës për të shmnagur që të qëllohej deputeti Ben Blushi, Veliaj tha se askush deri më tani nuk ka bërë avokatin e asaj sjellje të papëlqyeshme. “Nese do të kishte patur një protokoll organizmi që do të ishte zbatuar dhe nëse pjesëmarrësit nuk do të ishin provokuar, asgjë nga ato që ndodhën nuk do të kishte ndodhur. Sipas Veliajt turma antiblush permbante një “koleksion” njerëzish që nga ata me dokturaturë, deri tek njerëz që mund të kenë gjëra personale. “Kam respekt për këdo që kërkon në mënyrë civile të bëjë të ditura mosmarrëveshjet”, tha Veliaj, i cili nga ana e tij shtoi disa herë se e shikonte të paarsyeshme që t’i kerkohej kryeministrit pas dy palë zgjedhjeve të fituara dhe me një krizë refugjatësh tek porta që të linte punën dhe të bënte garë për kreun e partisë. “Kush zbret në fushë bëhet aktor, kush nuk hyn në fushë nuk ka as ndonjë të drejtë të madhe që të bërtasë pse nuk u gjuajt penalltia nga këtu apo nga atje”, tha Veliaj.
Leme alias Zylie
Kush ishte në merak se nënë Zylia do të dilte prapë në rrugë të shiste, mund të flejë rehat. Erion Veliaj i ka gjetur një treg të dytë nënë Lemës nga Mazreku i Kasharit. Jo larg vendit ku ajo është mësuar që të shesë perimet e serës së saj, gruaja mund të shkojë tek tregu në rrugën “Myslym Shyri”. Tregun e parë që i gjeti Bashkia ajo tha se e kishte larg, megjithëse fillimisht e pranoi duket sa për sy dhe faqe. “Juridikisht nuk duhet ta paguaja atë gjobë, por moralisht po, edhe pse ishte një gjobë e drejtë. tha Veliaj në Shih Programin në TVSH.
