Monika Kryemadhi ka zhvilluar sot një takim me strukturat e LSI në Tiranë. Gjatë fjalës së saj, Kryemadhi nuk ka kursyer akuzat ndaj Eron Veliaj dhe Lulzim Bashës. Për këtë të fundit ajo tha e shkatërroi opozitën me vetë dije dhe kjo gjë u duk fare qartë në zgjedhjet e 25 prillit. se sot jemi shumë herë më të qartë për tradhtinë e madhe që pësoi opozitarizmi shqiptar, nga ai që ndonëse i veshur me kostumin e kryeopozitarit të paepur, në fakt kishte shitur kauzat, e kishte tregtuar shpresën për ndryshimin e Shqipërisë dhe qeverisjes së saj, sikur të ishte besimi i shqiptarëve, një gjë që mund të shitej “lirë” në tregun e gjësë së gjallë.
“Kam marrë një ndjesi shumë pozitive nga njerëzit që kam takuar përgjatë Shqipërisë në këto muaj, një energji të jashtëzakonshme që nuk ishte ndjerë prej kohësh. Kjo është energjia e frymës që krijon shembulli i një opozite të vërtetë. Qytetarët në të gjithë vendin janë të lodhur me situatën aktuale dhe kërkojnë një alternativë”, tha Kryemadhi.
Më tutje ajo tregoi se, njerëzit mendojnë sot se gjërat në Bashkinë e Tiranës po shkojnë në drejtimin e gabuar sesa në drejtimin e duhur. Kryemadhi tha se kryeqyteti po shkatërrohet pasi Veliaj e ka kthyer në lavatriçe për pastrim parash. “S’ka si të jetë ndryshe, kur Tirana është kthyer në lavatriçe të pastrimit të parave të pista, e çdo vit Raportet Ndërkombëtare, me në krye Departamentin e Shtetit, e rendisin Shqipërinë si një vend ku pastrohen paratë e pista të krimit përmes sektorit të ndërtimit. Gjërat në Tiranë po shkojnë në drejtimin e gabuar, kur është faktuar qartë sesi Kryetari i Bashkisë Tiranë hedh firmën pa pyetur Këshillin Bashkiak, duke ndryshuar fatin e realizimit të koncesionit 30 vjeçar të inceneratorit të Tiranës. Këtë gjë e ka bërë në bashkëpunim me shokun e ngushtë Bllako, të cilit i garantoi edhe një vend të sigurtë në listën e kandidatëve për deputet të Tiranës. Një kontratë tërësisht korruptive, që ministra e zyrtarë të PS e kanë parë si plani financiar për të siguruar brezat e tyre për 30 vite, duke vjedhur taksat e qytetarëve të Tiranës, dhe bashkive të tjera të qarkut Tiranë”, tha ajo. Ndërsa theksoi se kjo qeveri e ka treguar qartë që është në dëm të popullit dhe për ta vjedhur atë.
