Nënkryetari i LSI Petrit Vasili shprehet se Shqipëria gjendet në një moment delikat në historinë e saj politike.
Me anë të një statusi në “Facebook”, Vasili shkruan se në muajin tetor pritet përgjigja nëse do të hapen negociatat e Shqipërisë me BE.
Postimi i Petrit Vasilit:
Mos hapja e negociatave në tetor, fajtorët jashtë nga politika!!
Tetori i këtij viti është një stacion kritik për Integrimin Europian të Shqipërisë.
Çdo moment kur është marrë në diskutim kjo çështje ka qenë mjaft i rëndësishëm, por ky tetor ndryshon rrenjësisht nga të gjithë momentet e tjerë.
Shqipëria shkon në Europë në tetorin me delikat me momentin historikisht më negativ të saj.
Tradicionalisht më parë ka pasur hapa qoftë edhe simbolike, por që me tonin të ishin hapa përpara, në momentet e verifikimeve, që Brukseli ka bërë përpara marrjes së vendimit të rëndësishëm, që ende nuk është arritur.
Ky tetor është pa asnjë diskutim më i errti, që Shqipëria po kalon.
Shpërbërja vertikale e të gjithë pushteteve është një realitet tronditës:
-që nga parlamenti i asgjësuar nga kapja prej qeverisë dhe shndërrimi në noter i saj
-tek qeverisja produkt dhe shërbëtorët e krimit trafiqeve dhe parave të pista,
-tek pushteti gjyqësor i kapur, i shantazhuar e i përdhosur dhe pa gjykatat e nivelit më të lartë dhe me një prokurori, që mbulon dhe nuk zbulon krimin dhe korrupsionin
-deri tek asgjësimi i themelit të demokracisë dhe ndarjes së pushteteve, që janë zgjedhjet e lira dhe të ndershme të cilat u asgjësuan dhe u zëvendësuan nga votimet moniste në 30 qershor.
Ky moment i errët shpërberës është prezantimi më i zymtë i Shqipërisë përballë një Europe ku kërkojmë të marrim hapjen e negociatave, të cilat kanë dështuar për vite me radhë në këtë tetor kritik. Do duhej domosdoshmërisht dhe menjëherë një akt madhor reflektues,që do të mund të rihapte një perspektivë europiane të rrezikuar keqas dhe me shanse afër zeros.
Zgjedhjet e lira dhe të ndershme dhe të menjëhershme do të ishin i vetmi hap, dhe asnjë tjetër, për të dhënë një sinjal përgjegjshmërie të thellë politike nga Shqipëria drejt Europës.
Kërkush në Shqipëri sot nuk ka nevojë për një qëndrim as mish as peshk për negociatat, sepse realisht ai do të ishte thjesht një bllokim dhe hap prapa dhe asgjë më shumë, përveçse vetëm do ti shërbente propagandës idiote të qeverisë së rilindjes,e cila njihet për paturpësinë e saj në kremtimin e hiçsukseseve dhe hapjen e shampanjës e dekoratat për hapjen e negociatave imagjinare të radhës.
Duhet pra një qëndrim i qartë për hapjen e negociatave. Qëndrimet dele dash të deritanishme të Europës për hapjen e negociatave,vendosja e kushteve,duartrokitjet për reforma inekzistente ,përgëzimet artificiale dhe hipokrite në funksion të interesave personale të burokrateve të vegjël në Bruksel, vetëm kanë renduar së tepërmi situatën në Shqipëri.
Shpërbërja shtetërore e të gjitha niveleve e pasqyruar shumë qartë në raportin e OSBE-IDIHR për votimet e paligjshme të 30 qershorit është një dëshmi politike, që e bën tetorin e integrimit akoma më të zymtë.
Rikthimi i votimeve moniste pa zgjedhje,refuzimi i dekreteve kushtetuese të presidentit,qeë krijoi hapësirën për të shpëtuar pluralizmin dhe sigurinë në vend si dhe kapja e të gjithë pushteteve nga rilindja janë atentate të vërteta ndaj integrimit europian të vendit. Sot nevojitet veprimi madhor zgjedhjet e lira dhe të ndershme,ai është i vetmi, që ka mbetur për shpëtimin e Integrimit Europian dhe evitimin e izolimit faktik që do të pasojë për vendin.
Nuk na duhen në tetor fraza të bukura kalemxhinjsh europiane, që qendisin negociata që nuk hapen,kushte që shtohen dhe shpresa të rrema bajate të një objektivi, që s’realizohet kurrë. Negociata ose hapen pa asnjë kusht dhe ecim përpara ose do të thotë të shohim një film bajat të parë disa herë. Alibi për mos hapjen e negociatave nuk ka dhe as që mund të ketë.
Instrumenti mbretëreshë është aty përpara të gjithëve dhe janë zgjedhjet e lira dhe të ndershme.
Kush i pengon ato duhet të bëhet gati të dalë përfundimisht nga politika dhe ky është një verdikti i hidhur nga i cili fajtorët nuk do të shpëtojnë dot me asnjë mjet e mënyrë.
