Dhjetra tregtarë janë ngritur në protesta mëngjesin e sotëm para Bashkisë së Durrësit. Tregtarët ankohen për vendosjen e gjobave të fshehta dhe të kripura nga tatimorët prej 3 ditësh.
Sipas tyre inspektorët e tatimeve i kanë penalizuar pasi në bizneset e tyre nuk ka kasë fiskale por ata theksojnë se ata nuk menaxhojnë biznese të vogla por ambulant dhe taksat i paguajnë në Bashki.
Tregtarët shprehen se tatimorët u kanë kërkuar vendosjen e kasës fiskale, por ata thonë se nuk mund të liçencohen si biznes i vogël pasi të ardhurat janë të pamjaftueshme.
Tregtarët e tregut industrial të Durrësit thonë se xhiroja ditore ka rënë aq shumë, sa shpesh nuk arrijnë të shesin asnjë produkt.
Tjetër shqetësim për tregtarët është konkurenca e paligjshme, ajo e shitësve ambulantë që tregtojnë nëpër trotuarë dhe në rrugë. Ata akuzojnë bashkinë dhe policinë bashkiake që i lejojnë ata të kryejnë aktivitetin tregtar.
